The Outsider - ასე ერქმევა სტივენ კინგის მორიგ წიგნს, რომელიც ა.შ.შ-ში 22 მაისს გამოვა. წიგნს, ტრადიციულად, Scribner-ის გამომცემლობა დაბეჭდავს. წიგნის სათაური ჯერ კიდევ 2017 წლის ზაფხულში გახდა ცნობილი, თუმცა რომანის სინოფსისი და გამოსვლის თარიღი უცნობი იყო.

ისინი, ვინც წიგნი უკვე წაიკითხეს, ამბობენ, რომ კინგის ახალი წიგნი ბესტსელერობისთვისაა განწირული. ცხადია, ეს სიურპრიზი არავისთვისაა, თუმცა მაინც საინტერესოა, რას შემოგვთავაზებს ავტორი.

როგორც ირკვევა, წიგნში მოვლენები თერთმეტი წლის ბიჭის სასტიკი მკვლელობის გარშემო ვითარდება. პოლიცია ბიჭის გვამს ქალაქის ცენტრალურ პარკში პოულობს. თვითმხილველების განცხადებით, მკვლელობა ადგილობრივი საფეხბურთო გუნდის ბავშვთა მწვრთნელმა, ინგლისურის მასწავლებელმა და ორი შვილის მამამ, ტერი მეიტლანდმა ჩაიდინა. ამას თითის ანაბეჭდებიც მოწმობს.

...თუმცა, სტივენ კინგის წიგნებში ყველაფერი ასე მარტივად არ ხდება. მკვლელობაში ეჭვმიტანილს აქვს სერიოზული ალიბი, რომელიც მის უდანაშაულობას მოწმობს, მაგრამ მიუხედავად ამისა, მას არავინ ენდობა. დეტექტივი რალფ ანდერსონი, რომლის შვილსაც მეიტლანდი წვრთნიდა, მისი დაკავების ბრძანებას გასცემს და მწვრთნელს საჯაროდ აპატიმრებენ. მტკიცებულებებს ისიც ემატება, რომ გვამთან დაღვრილ სისხლში მეიტლანდის დნმ-იც აღმოჩნდება.

თქვენ შეიძლება ფიქრობდეთ, რომ წიგნის მთავარი სცენარი გაგანდეთ, მაგრამ როგორც კრიტიკოსები ამბობენ, ეს მხოლოდ დასაწყისია.

ვინ არის სინამდვილეში ტერი მეიტლანდი? - როდესაც ამ კითხვაზე პასუხს გაიგებთ, იმედია დამამშვიდებელი აბები ახლოს გექნებათ.

როდის ითარგმნება სტივენ კინგის ახალი წიგნი ქართულ ენაზე, ჯერჯერობით უცნობია, თუმცა ამაზონზე თქვენ დღესვე შეგიძლიათ მისი შეძენა, თუმცა მას მხოლოდ მაისში მიიღებთ.