ომბუდსმენის, უჩა ნანუაშვილის თქმით, სახალხო დამცველის წარმომადგენელმა სპეცოპერაციის დროს დაკავებული მოინახულა. მისი განმარტებით, ის უარყოფს ტერორიზმთან კავშირს, თუმცა აღიარებს ცეცხლსასროლი იარაღის ფლობას.

"ის ასევე ამბობს, რომ არ იცნობდა იმ ადამიანებს, რომელთა წინააღმდეგაც განხორციელდა სპეცოპერაცია. მხოლოდ ერთ ადამიანს იცნობდა. შესაბამისად, ის იყო დაინტერესებული, რომ მეტი ინფორმაცია მიეღო თავისი დაცვის სამართლებრივი მექანიზმების შესახებ, რა ინფორმაციაც, ჩვენ მას მივაწოდეთ".

ნანუაშვილის განცხადებით, გამოძიებამ ყველა იმ კითხვას უნდა გასცეს პასუხი, რომელიც სპეცოპერაციის დრო წარმოიშვა, მათ შორის, როგორ მოხვდა აჰმედ ჩატაევი საქართველოში.

სპეცოპერაცია ისანში

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია. გამოძიება სიხლის სამართლის კოდექსის 3231-ე მუხლის პირველი ნაწილითა და 328-ე მუხლით მიმდინარეობს, რაც ტერორზმთან დაკავშირებული მუხლებია.

ისნის სპეცოპერაციის დროს დაკავებულს, დახურულ სხდომაზე, აღკვეთის ღონისძიებად პატიმრობა 24 ნოემბერს შეეფარდა. ტერორიზმში ბრალდებული პირის ვინაობას, მის სახელსა და გვარს არც მისი ადვოკატი და არც პროკურორები ამხელენ. თუმცა ცნობილია მისი ინიციალები - ს.დ. რუსთავი 2-ის ინფორმაციით, დაკავებული პირი ლაფანყურის სპეცოპერაციასთან დაკავშირებული სუხო დუდაევია. ტელეკომანიის განცხადებით, აღნიშნული ინფორმაცია მას სანდო წყარომ დაუდასტურა.