სახელმწიფო უსაფრთხოების სამსახურის ხელმძღვანელის, ვახტანგ გომელაურის თქმით, არსებობს ეჭვი, რომ სპეცოპერაციის დროს გარდაცვლილ პირთა შორის აჰმედ ჩატაევი იყოს. მისივე თქმით, დაზუსტებული პასუხი ჯერ კიდევ არ არსებობს, ვინაიდან მიმდინარეობს საექსპერტო სამუშაოები და მხოლოდ ამის შემდეგ გახდება ცნობილი ზუსტი პასუხი. ინფორმაციას ინტერპრესნიუსი ავრცელებს.

სპეცოპერაციის დროს, სავარაუდოდ, აჰმედ ჩატაევის გარდაცვალებასთან დაკავშირებით ინფორმაცია თურქულმა მედიამაც გაავრცელა. აჰმედ ჩატაევი თურქეთის ხელისუფლების მიერ მიჩნეულია სტამბოლის ათათურქის აეროპორტში 2016 წელს განხორციელებული ტერაქტის ავტორად. აღნიშნულ ფაქტს მაშინ 45 ადამიანი ემსხვერპლა.

სპეცოპერაცია ისანში

თბილისში, ისანში, ბერი გაბრიელ სალოსის ქუჩაზე, 21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი, ერთი კი დაკავებულია.

ისნის სპეცოპერაციის დროს დაკავებულს, დახურულ სხდომაზე, აღკვეთის ღონისძიებად პატიმრობა 24 ნოემბერს შეეფარდა. ტერორიზმში ბრალდებული პირის ვინაობას, მის სახელსა და გვარს არც მისი ადვოკატი და არც პროკურორები ამხელენ. თუმცა ცნობილია მისი ინიციალები - ს.დ. რუსთავი 2-ის ინფორმაციით, დაკავებული პირი ლაფანყურის სპეცოპერაციასთან დაკავშირებული სუხო დუდაევია. ტელეკომანიის განცხადებით, აღნიშნული ინფორმაცია მას სანდო წყარომ დაუდასტურა.

დღეს, 26 ნოემბერს ქაშუეთის ეკლესიაში სპეცოპერაციის დროს დაღუპული სპეცრაზმელის სამოქალაქო პანაშვიდი მიმდინარეობს. გარდაცვლილს მუხათგვერდის ძმათა სასაფლაოზე დაკრძალავენ.