საქართველოს მთავრი პროკურატურის ინფორმაციით, 21–22 ნოემბერს, გაბრიელ სალოსის გამზირზე მიმდინარე სპეცოპერაციის ფარგლებში დაკავებულ ს. დ.-ს ბრალი წაუყენეს.

სამართალდამცავი უწყების ცნობით, მას უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში მისი დახმარებისთვის, ასევე ცეცხლსასროლი იარაღის, საბრძოლო მასალის, ფეთქებადი ნივთიერების და ასაფეთქებელი მოწყობილობის ტერორისტული მიზნით, მართლსაწინააღმდეგო შეძენა, შენახვა, ტარებისთვის წარედგინა ბრალდება საქართველოს სისხლის სამართლის კოდექსის 328-ე და 323 პრიმა მუხლის პირველი ნაწილით. აღნიშნული დანაშაული, სასჯელის სახედ და ზომად, დამტკიცების შემთხვევაში, თავისუფლების აღკვეთას 10-დან 17 წლამდე ვადით ითვალისწინებს.

როგორც დაკავებულის სახაზინო ადვოკატმა იმედა ქარქაშაძემ ჟურნალისტებს უთხრა, დაკავებული ბრალს არ აღიარებს:

"ის მანამდე არის დაკავებული, სანამ სპეცოპერაცია დაიწყებოდა. არანაირი კავშირი არ აქვს მას ტერორისტულ ორგანიზაციასთან".

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.