10 ნოემბერს, ტრანსგენდერთა ხსოვნის ნაციონალური დღე ტრანსგენდერი ქალის მარია კასენკოს პერფორმანსით "შემოდგომის ყვავილები" აღნიშნეს, რომლის ავტორი პოეტი ანდრო დადიანია.

"ძალიან მნიშვნელოვანია მიხვდეს საზოგადოება რას განვიცდით ჩვენ რეალურად და რა ხდებოდა იმ მომენტში, იმ წლებში. ამ პერფორმანსით იმის თქმა გვინდა, რომ თითოეულ ადამიანს აქვს მონაწილეობა მიღებული ყველა იმ დამდგარ სიკვდილში, რაც ბოლო წლებში მოხდა. მე პირადად არ მექმნება პრობლემა, მაგრამ ეს იმას არ ნიშნავს რომ არ არსებობს. ჩემს მეგობრებს ხშირად ექმნებათ პრობლემები. საჭიროდ მივიჩნიე მე მიმეღო მონაწილეობა ამ პერფორმანსში და სხვისი პრობლემები გამომეტანა", - ამბობს მარია კასენკო.

ფოტო: გვანცა ნემსაძე / On.ge

ორგანიზაცია თანასწორობის მოძრაობის წარმომადგენელი ლევან ბერიანიძე ამბობს, რომ 10 ნოემბრის აღნიშვნა ემსახურება საზოგადოებისთვის ყურადღების მიპყრობას იმ პრობლემაზე, რომელიც დგას ლგბტ თემში, ტრანსგენდერ ადამიანებში, რომლებიც მუდმივად აწყდებიან ძალადობას.

ფოტო: გვანცა ნემსაძე / On.ge

საბი ბერიანის სახელით, სიძულვილით მოტივირებული დანაშაულის მსხვერპლი ადამიანების ხსოვნის დღეს აღნიშნავენ. ის სწორედ ამ დღეს, სამი წლის წინ მოკლეს. ერთი წლის შემდეგ, საკუთარ სახლში გაზით გაგუდული იპოვეს ტრანსგენდერი ქალი ბიანკა შიგუროვა, 2016 წელს კი ყელი გამოსჭრეს ტრანსგენდერ ქალ ზიზის, რომელიც მოგვიანებით საავადმყოფოში გარდაიცვალა.

ფოტო: გვანცა ნემსაძე / On.ge

გასული წლის დეკემბერში, საქართველოს უზენაესმა სასამართლომ დააკმაყოფილა პროკურატურის მოთხოვნა. საბი ბერიანის მკვლელობაში ბრალდებული ლევან კოჭლაშვილი დამნაშავედ სცნო და 10 წლით თავისუფლების აღკვეთაც შეუფარდა.

ტრანსგენდერი აქტივისტის ნიკოლო ღვინიაშვილის (ბარტის) ინიციატივითა და არასამთავრობო ორგანიზაცია თანასწორობის მოძრაობის მხარდაჭერით 2015 წლიდან 10 ნოემბერი ტრანსგენდერთა ხსოვნის ნაციონალურ დღედ გამოცხადდა.

მსოფლიო უკვე მრავალი წელია 20 ნოემბერს აღნიშნავს ტრანსგენდერთა ხსოვნის საერთაშორისო დღეს - ეს დღე 1999 წელს რიტა ჰესტერის ხსოვნის პატივსაცემად დაწესდა. ჰესტერი ტრანსგენდერი ქალი იყო, რომელიც 1998 წლის 28 ნოემბერს სასტიკად მოკლეს, მისი მკვლელობა კი გამოუძიებელი დარჩა.