53 წლის იტალიელი მსახიობი მონიკა ბელუჩი რომში ვირნა ლიზის სახელობის პრიზით დააჯილდოვეს, რაც მას იმ მსახიობებს შორის აყენებს, რომლებმაც იტალიისა და მსოფლიო კინოზე გავლენა მოახდინეს.

The Hollywood Reporter-მა იტალიელ მსახიობთან ინტერვიუ ჩაწერა, სადაც ბელუჩიმ იმაზე ისაუბრა, თუ რატომაა აუცილებელი ქალები სექსუალურ შევიწროებაზე ალაპარაკდნენ.

ბელუჩის თქმით, ის ჯერ კიდევ თინეიჯერი იყო, როდესაც მუშაობა ჯერ მოდელად, შემდეგ კი მსახიობად დაიწყო და მას სექსუალურ შევიწროებაზე ბევრი აქვს სათქმელი.

მსახიობი დასძენს, რომ ბედნიერია, რომ მისი შვილები იმ პერიოდში იზრდებიან, როდესაც ქალებს გამბედაობა ყოფნით, სექსუალურ შევიწროებაზე ისაუბრონ:

"მნიშვნელოვანია, რომ ქალები გამოვიდნენ, იპოვონ სიმამაცე და ისაუბრონ იმ ყველაფერზე, რაც მათ შიშის დაძლევაში დაეხმარებათ. შიში ჩვენს დნმ-შია".

ბელუჩის თქმით, ის ძალიან ბრაზდება, როცა ჰარვი ვაინშტაინის მსხვერპლებს იმის გამო აკრიტიკებენ, რომ აქამდე არ ალაპარაკდნენ:

"ხალხი ამბობს 'აქამდე რატომ არ გამოვიდნენ ეს ქალები? რატომ არაფერი თქვეს აქამდე?' როცა ჩიტი დიდი ხანი გალიაშია ჩაკეტილი, კარები რომც გაუღო, ის გალიას აღარ ტოვებს. ამ ყველაფრის გასაჯაროება შინაგან ცვლილებებს მოითხოვს, რასაც დრო და სიმამაცე სჭირდება".

კითხვაზე, თავად გამოუცდია თუ არა სექსუალური შევიწროება, მონიკა ბელუჩი პასუხობს:

"რა თქმა უნდა. არ მგონია მსოფლიოში არსებობდეს ქალი, რომელსაც ეს [სექსუალური შევიწროება] რამე ფორმით არ გამოუცდია. ქალებმა პატარაობიდანვე უნდა იცოდნენ, როგორ გაუმკლავდნენ ამ დამოკიდებულებებს. სექსუალური შევიწროება იმდენად ხშირად ხდება, რომ ხანდახან ეს ნორმალური გეჩვენება, მაგრამ ეს ნორმალური არ არის და ჩვენ ჩვენს შვილებს უნდა ვასწავლოთ, რომ ეს ჩვეულებრივი რამ არ არის. ბავშვებმა უნდა იცოდნენ, როგორ გაუმკლავდნენ მსგავს სიტუაციებს და თავი ამის გამო დამნაშავედ თვითონ არ უნდა იგრძნონ".

ბელუჩის თქმით, მის ბავშვობაში ამ თემაზე საზოგადოებას მაღალი ცნობიერება არ ჰქონდა და გოგოებმა არ იცოდნენ, რომ თუ სექსუალური შევიწროების მსხვერპლნი გახდებოდნენ, ეს მათი ბრალი არ იყო:

"უფროსები მხოლოდ გოგოებს გვასწავლიდნენ იმას, თუ რა უნდა ჩაგვეცვა და როგორ უნდა მოვქცეულიყავით, რომ პროვოკაციული სიტუაცია არ გამოგვეწვია. თუმცა აუცილებელია კაცებისთვის იმის ახსნა, რომ ისინი ქალებს არ უნდა ავიწროებდნენ".

მონიკა ბელუჩი ამბობს, რომ სიტუაციის კონტროლი მხოლოდ ქალების პასუხისმგებლობა არაა და კაცებმა უნდა იცოდნენ სწორად მოქცევა და საკუთარი ადგილი.

ბელუჩი Miramax-ის რამდენიმე ფილმშია გადაღებული, მათ შორისაა მალენა და ძმები გრიმები. ჰარვი ვაინშტაინთან თანამშრომლობაზე ის ამბობს:

"მე არ მომიწია ამ სიტუაციებში მოხვედრა, რადგან ვიცოდი როგორ გავმკლავებოდი ამას. როცა ლამაზი ქალი ხარ და ისეთ სიტუაციაში გიწევს მუშაობა, სადაც შენი გარეგნობა და იმიჯი სამსახურის ნაწილია, რა თქმა უნდა სწავლობ, როგორ შეხვდე მსგავს სიტუაციებს".

ბელუჩიმ ინტერვიუში ფსიქოლოგთან საუბარიც გაიხსენა:

"ერთხელ ძალიან ცნობილ ფსიქოლოგ კაცს ვესაუბრებოდი და მან მითხრა, რომ ძალაუფლების მქონე კაცებს ხშირად პიროვნების გაორება აქვთ. მათი ერთი მხარე ნორმალურია, მეორე კი - ცხოველს ჰგავს. როცა ასეთ კაცებს ხვდები, ჯობია რომ ურთიერთობა ნორმალურ მხარესთან გქონდეს. მე ვფიქრობ, რომ როდესაც კაცებს ძალაუფლება აქვთ, ისინი ფიქრობენ, რომ მათ ქცევების კონტროლი არ მოეთხოვებათ და მათთვის ყველაფერი დასაშვები და შესაძლებელია".

ბელუჩი მიიჩნევს, რომ სექსუალური შევიწროების მიმართ მსოფლიოს დამოკიდებულება იცვლება:

"ბევრი რამე შეიცვალა სულ რამდენიმე თვეში. გარშემო დამოკიდებულებების ცვლილებებს უკვე ვგრძნობ. როცა აეროპორტში ან რესტორანში ვარ, მეტ პატივისცემას ვიღებ ადამიანების მხრიდან. ისინი უფრო თავდაჭერილები არიან. ვგრძნობ, რომ სიტუაცია უკეთესობისკენ იცვლება".