ილიას სახელმწიფო უნივერსიტეტის ზოოლოგიის ინსტიტუტის თანამშრომელმა შალვა ბარჯაძემ და ლონდონის ბუნების ისტორიის მუზეუმის თანამშრომელმა, დოქტ. როჯერ ბლექმენმა ზემო სვანეთში მცენარე Oberna multifida Ikonn–ზე (Caryophyllaceae) მობინადრე ბუგრის (Hemiptera: Aphididae) ახალი სახეობა აღმოაჩინეს.

ბუგრი მიეკუთვნება გვარ Macrosiphum-ს და მანამდე საქართველოში ამ გვარის 11 სახეობა იყო რეგისტრირებული.

მეცნიერებმა ბუგრის ახალ სახეობას Macrosiphum eastopi ცნობილი ინგლისელი აფიდოლოგის, დოქტ. ვიქტორ ისტოპის პატივსაცემად უწოდეს. ახალი სახეობა აღწერეს უფრთო და ფრთიან პართენოგენეზურ მდედრებსა და მამრებზე დაყრდნობით.

კავკასიის მაღალმთიანეთში აღმოჩენილი Macrosiphum eastopi მორფოლოგიურად ჰგავს ალპებში გავრცელებულ Macrosiphum hartigi-ს.

ამავე პუბლიკაციაში მოცემულია Macrosiphum hartigi-ის პართენოგენეზური და სქესობრივი ფორმების ხელახალი აღწერა.