15, 16 და 17 ნოემბერს, თბილისში ჩატარდება DataFest Tbilisi - პირველი ყოველწლიური მონაცემთა საერთაშორისო ფესტივალი სამხრეთ კავკასიის რეგიონში, რომელსაც 20 ქვეყნიდან ჩამოსული 400-ზე მეტი მონაწილე ეწვევა.

ფესტივალის მონაწილეების წინაშე 40 ქართველი და უცხოელი მომხსენებელი წარსდგება. მათ შორის არიან Facebook-ის, CNN-ის, Zalando-სა და სხვა საერთაშორისო ორგანიზაციების წარმომადგენლები, რომლებიც მონაცემებზე სხვადასხვა კუთხით ისაუბრებენ.

ფესტივალის ერთ-ერთი სპიკერია UI/UX დიზაინერი მარიამ ქობულაძე. მარიამი JumpStart Georgia-ში ოთხი წლის განმავლობაში მუშაობდა და მისი ძირითადი საქმიანობა მონაცემების საინტერესო და განსხვავებული ფორმით გამოსახვა იყო.

DastaFest-ს 40-ზე მეტი ქართვლი და უცხოელი სპიკერი ეყოლება, კონკრეტულად თქვენ რა ფორმით იქნებით ფესტივალში ჩართული?

- ფესტივალი, როგორც იცით, სამდღიანია. პირველ დღეს იქნება ე.წ. Inspirational Talk-ები, რომელზეც ვილაპარაკებ ზოგადად მონაცემთა ვიზუალიზაციაში დიზაინის როლზე. მეორე დღეს მექნება ვორქშოფი, რომელიც უფრო პრაქტიკული იქნება და ვეცდები, დამსწრე საზოგადოებას ავუხსნა დიზაინის ის ძირითადი პრინციპები, რომლებიც მონაცემთა ვიზუალიზაციის, თუ ნებისმიერი სხვა დიზაინის კეთებისას უნდა დაიცვან. ასევე, ვიქნები მენტორი მინი ჰაკათონზე და გუნდებს, საჭიროების შემთხვევაში, მონაცემების სწორად გამოსახვაში დავეხმარები.

რა განაპირობებს მონაცემების მზარდ მნიშვნელობას მსოფლიოში?

- იმის გამო, რომ დღეს ტექნოლოგიები ძალიან განვითარებულია, მონაცემები უფრო ადვილად ხელმისაწვდომია ადამიანისათვის. მონაცემები ძალიან მნიშვნელოვანია, რადგან გვაჩვენებს ზოგად, ობიექტურ სურათს - იმას, რაც ჩვენი თვალთახედვით მარტივად არ ჩანს. მონაცემებთან ურთიერთობა და მათი ხალხისთვის მარტივი ფორმით მიწოდება კომუნიკაციების ყველა სპეციალისტს სჭირდება, მნიშვნელობა არ აქვს ეს იქნება ჟურნალისტი, მარკეტერი თუ სამოქალაქო ორგანიზაციის წარმომადგენელი. დღეს აღარავინ კითხულობს გრძელ სტატიებს თუ ანგარიშებს, სწორედ ამიტომ საჭიროა მონაცემები ჩვენს აუდიტორიამდე მარტივი, მიმზიდველი ენით მივიტანოთ.

რატომ უნდა მოვიდეს ხალხი DataFest-ზე?

- იმიტომ, რომ ისინი მონაცემებს ბევრი საინტერესო, ახალი კუთხიდან დაინახავენ. ბევრს ახალს ისწავლიან, გაეცნობიან ამ მიმართულებით საერთაშორისო ტენდენციებს და უკვე არსებულ ცოდნას კი პრაქტიკაში გამოიყენებენ. მსგავსი ღონისძიებები community builidng- სთვის ძალიან მნიშვნელოვანია, რადგან სხვადასხვა სფეროში მომუშავე ადამიანებს საშუალება ეძლევათ გაიცნონ ერთმანეთი, ერთად იმუშავონ და ერთობლივი პროექტებიც დაგეგმონ.

DataFest-ის ორგანიზატორია ორგანიზაცია ForSet-ი, რომელიც მონაცემების, დიზაინისა და ტექნოლოგიის სფეროში მოღვაწეობს. მასთან ერთად, ფესტივალს ორგანიზებას უწევს ორგანიზაცია Digital Communication Network (DigiComNet). ღონისძიება პრაღის სამოქალაქო საზოგადოების ცენტრისა (PCSC) და UNDP-ის სტამბულის ინოვაციების ჰაბის მხარდაჭერით იმართება.

ფესტივალში მონაწილეობის მისაღებად აუცილებელია ბილეთების შეძენა. დეტალური ინფორმაციისთვის გაეცანით ჩვენს მიერ მომზადებულ სტატიას.

მონაცემთა საერთაშორისო ფესტივალი კახა ბენდუქიძის საუნივერსიტეტო კამპუსში ჩატარდება.