თუ Amazon-იდან ოდესმე რამე გამოგიწერიათ, არის შანსი, რომ შეკვეთა შეცდომით მოსულიყო - მაგალითად, ერთი ზომით პატარა ან დიდი ფეხსაცმელი, წითლის ნაცვლად ლურჯი ფერის მაისური. მაგრამ ორლანდოელი წყვილისთვის პლასტმასის 4 კონტეინერის გაგზავნისას, ამაზონმა, შეიძლება ითქვას, საუკუნის შეცდომა დაუშვა.

როცა ოჯახმა შეკვეთილი კონტეინერები მიიღო, აღმოჩნდა, რომ შეფუთული ტვირთი მოსალოდნელზე მძიმე იყო. გახსნისას წყვილმა ცარიელი კონტეინერების ნაცვლად მარიხუანის დიდი მარაგი აღმოაჩინა - 29 კილოგრამი. მათ ძალიან შეეშინდათ და მაშინვე გამოიძახეს პოლიცია. სამართალდამცველებმა Amazon-ს მიმართეს, მაგრამ მათგან პასუხი ჯერჯერობით არ მიუღიათ.

გამოძიების პარალელურად, წყვილი თვითონაც ცდილობდა ამაზონისგან პასუხის მიღებას, მაგრამ კომპანიაში ვერაფერი უთხრეს და ვერც შეცდომა ახსნეს, მაგრამ ბოდიშის ნიშნად 150 დოლარიანი სასაჩუქრე ბარათი გადასცეს.