ისრაელის პარლამენტმა ახალი საკანონმდებლო ცვლილება დაამტკიცა, რომლის მიხედვითაც, პალესტინელებისთვის, რომლებიც სასიკვდილო ტერორისტულ თავდასხმებში იქნებიან მსჯავრდებულნი, სიკვდილით დაისჯებიან. ამის შესახებ ინფორმაციას BBC ავრცელებს.

კანონი ქნესეთში მესამე მოსმენით 62 ხმით 48-ის წინააღმდეგ მიიღეს. კენჭისყრას მხარი დაუჭირა ქვეყნის პრემიერმინისტრმა ბენიამინ ნეთანიაჰუმაც.

კანონპროექტის მიხედვით, ისრაელის სამხედრო სასამართლოებში "ტერორისტულ აქტებად" მიჩნეული სასიკვდილო თავდასხმებისთვის მსჯავრდებული პალესტინელები 90 დღის ვადაში ჩამოხრჩობით დაისჯებიან, ხოლო გადავადება მაქსიმუმ 180 დღით იქნება შესაძლებელი.

როგორც განცხადებაშია ნათქვამი, მიუხედავად იმისა, რომ თეორიულად კანონი ისრაელის მკვიდრ ებრაელებზეც შეიძლება გავრცელდეს, პრაქტიკაში ეს ნაკლებად მოსალოდნელია, ვინაიდან სიკვდილით დასჯა მხოლოდ იმ შემთხვევაში დაიშვება, თუ თავდასხმის მიზანი "ისრაელის სახელმწიფოს არსებობის უარყოფა" იქნება.

კანონის მთავარი ინიციატორი ეროვნული უსაფრთხოების მინისტრი იტამარ ბენ-გვირი იყო, რომელმაც კენჭისყრის შემდეგ X-ზე გამოაქვეყნა: "ჩვენ შევქმენით ისტორია!!! ჩვენ დავდეთ პირობა და ეს პირობა შევასრულეთ", — აღნიშნულია განცხადებაში.

კანონს მწვავე კრიტიკა მოჰყვა როგორც ქვეყნის შიგნით, ისე მის ფარგლებს გარეთ. ოპოზიციური დემოკრატიული პარტიის ლიდერმა იაირ გოლანმა კანონი გააკრიტიკა და თქვა, რომ აღნიშნული ნაბიჯი შესაძლოა საერთაშორისო სანქციების საწინდარიც გახდეს.

"ტერორისტებისთვის სიკვდილით დასჯის კანონი არის ზედმეტი, რომელიც მხოლოდ ბენ-გვირისთვის დამატებითი პოპულარობის მოპოვებას ემსახურება, ის არანაირად შეუწყობს ხელს ისრაელის უსაფრთხოებას", — განაცხადა მან.

აქვე, კენჭისყრის წინ "ღრმა შეშფოთება" გამოთქვეს ბრიტანეთმა, საფრანგეთმა, გერმანიამ, იტალიამ და განაცხადეს, რომ კანონი დემოკრატიულ პრინციპებს ეწინააღმდეგება.

კანონი დაგმო პალესტინის ავტონომიამაც, რომელთა განცხადებითაც, ის "კანონმდებლობის საფარქვეშ ცდილობს უსამართლო მკვლელობების ლეგიტიმაციას".

ამავე დროს, ისრაელის სამოქალაქო უფლებების ასოციაციამ უკვე მიმართა ქვეყნის უზენაეს სასამართლოს, სადაც კანონის კონსტიტუციურობა უნდა განიხილონ.

ისრაელს ისტორიაში მხოლოდ ორი ადამიანი ჰყავს სიკვდილით დასჯილი — მათ შორის ერთ-ერთი ცნობილი ნაცისტი მაღალჩინოსანი ადოლფ აიხმანი იყო, რომელმაც მნიშვნელოვანი როლი ითამაშა ჰოლოკოსტის განხორციელებაში.