მარცხენა თვალზე ტატუს გაკეთების შემდეგ, კანადელი მოდელი ნაწილობრივ დაბრმავდა. 24 წლის კეტ გელინჯერმა სალონში სკლერაზე ტატუს გაკეთება მოითხოვა, რაც მისი თვალის თეთრ გარსს შეაფერადებდა.

თუმცა ტატუს გაკეთების შემდეგ სავალდებულო მოვლის პროცედურებისას, მისი თვალიდან იასამნისფერმა სითხემ დაიწყო გადმოსვლა, ამ დროს მიხვდა კეტი, რომ მისი ტატუს გაკეთების პროცედურა არც ისე სახარბიელოდ წარიმართა.

პროცედურიდან 4 კვირის შემდეგ ის უკვე მარცხენა თვალით ნაწილობრივ ვეღარ ხედავს. "უმძიმესი შეცდომა დავუშვი" - ამბობს 24 წლის გოგო.

კეტის ექიმებმა ანტიბიოტიკური თვალის წვეთები გამოუწერეს, თუმცა წამალს საწინააღმდეგო ეფექტი ჰქონდა. 1 კვირის შემდეგ, მისი მხედველობა საგრძნობლად დაქვეითდა და ახლა ის საგნებს გადღაბნილად ხედავს.

ამის შემდეგ, მას სტეროიდული წვეთები მისცეს, თუმცა მან კეტის თვალის მდგომარეობა კიდევ უფრო გაამწვავა და იასაფნისფერმა სითხემ მისი თვალის რქოვანას ნაწილიდან დაიწყო დენა.

ექიმებმა გელინჯერს უთხრეს, რომ ტატუს გაკეთებისას მის თვალში არასტერილიზებული მასალა გამოიყენეს, რამაც ინფექცია გამოიწვია.

საავადმყოფოში მას ასევე უთხრეს, რომ მისი თვალი სრულად ვერასდროს გაჯანსაღდება და შესაძლოა მან მხედველობა სრულად დაკარგოს.

თუმცა თავის ბოლო ვიდეოში, კეტი ამბობს, რომ მისი მხედველობა ბოლო პერიოდში გაუმჯობესდა, თუმცა გადატანილი გამოცდილების გამო სტრესიდან ჯერ კიდევ არ გამოსულა.