თურქეთის პრეზიდენტმა, რეჯეფ თაიფ ერდოღანმა და მისმა რუსმა კოლეგამ ვლადიმერ პუტინმა დღეს სატელეფონო საუბრისას აშშ-სა და რუსეთის პრეზიდენტებს შორის გასულ კვირას ალასკაში გამართული სამიტის შედეგები, სავაჭრო საკითხები და ორმხრივი ურთიერთობები განიხილეს.

"ტელეფონის საუბრისას განიხილეს ალასკის სამიტის შედეგები და თურქეთ-რუსეთის ორმხრივი ურთიერთობები, განსაკუთრებით სავაჭრო კავშირები," — განაცხადა თურქეთის კომუნიკაციების დეპარტამენტმა თურქულ სოციალურ მედია პლატფორმა NSosyal-ზე.

მათივე ცნობით, ერდოღანმა სატელეფონო საუბრისას პუტინს უთხრა, რომ თურქეთი გულწრფელად ცდილობს სამართლიანი მშვიდობის მიღწევას

"პრეზიდენტმა ერდოღანმა განაცხადა, რომ ყურადღებით აკვირდება სამშვიდობო პროცესთან დაკავშირებულ მოვლენებს და ხაზგასმით აღნიშნა, რომ (უკრაინის) ომის დაწყებიდან თურქეთი გულწრფელად ცდილობს სამართლიანი მშვიდობის მიღწევას და ამ მხრივ მხარს უჭერს მიდგომებს, რომლებიც მიზნად ისახავს ყველა მხარის მონაწილეობით მდგრადი მშვიდობის დამყარებას," — ნათქვამია განცხადებაში.

კომუნიკაციების დეპარტამენტის ცნობით, "პრეზიდენტმა პუტინმა მადლობა გადაუხადა პრეზიდენტ ერდოღანს სამშვიდობო მოლაპარაკებების მასპინძლობისთვის და თურქეთის ძალისხმევისთვის.

ორივე პრეზიდენტი ასევე "შეთანხმდა ორ ქვეყანას შორის დიალოგის შენარჩუნების მნიშვნელობაზე".