კინო რუსთაველის შენობის პირველ სართულზე არაბთა გაერთიანებული საამიროების დეველოპერული კომპანია Emaar-ის შვილობილის Eagle Hills-ის გაყიდვების ოფისი და შოურუმი განთავსდება განთავსდება. ამის შესახებ თბილისის მერიის არქიტექტურის სამსახურის მიერ გაცემული ნებართვიდან ირკვევა.

Commersant.ge-ს ცნობით, კულტურულის მემკვიდრეობის ძეგლზე სამუშაოების ჩატარების ნებართვა მუნიციპალიტეტის არქიტექტურის სამსახურმა 8 აგვისტოს გასცა.

პროექტი ითვალისწინებს ინტერიერისა და ფასადის სარესტავრაციო, სარემონტო სამუშაოებს. არქიტექტურული პროექტის მიხედვით, დაგეგმილია შენობის პირველი სართულისა და ვესტიბიულის ზონაში ნაწილობრივი ფუნქციური ადაპტაცია. ფასადი მოპირკეთდება გრანიტის ქვით და მოიხსნება მინის ვიტრაჟები. რედიზაინი ითვალისწინებს ორფრთიანი "ხის კარების, ვიტრინებისა და ქვის მოპირკეთების აღდგენას".

ამავე დოკუმენტის მიხედვით, შენობის ფასადებს "ჩაუტარდება რესტავრაცია-რეაბილიტაცია და მაქსიმალურად დაუბრუნდება თავდაპირველი სახე".

"რაც ემსახურება ძეგლის პოტენციალის ეტაპობრივ გააქტიურებას და საზოგადოებისათვის მისდამი ხელმისაწვდომობის გაზრდას. ამგვარი გამოყენება ემყარება შენობის ღირებულებითი და ავთენტური მახასიათებლების დაცვის პრინციპებს, რაც გულისხმობს მინიმალურ ფიზიკურ ჩარევას", — ვკითხულობთ პროექტის განმარტებით ბარათში.

მიმდინარე წლის იანვარში ოცნების ხელისუფლების მთავრობის ადმინისტრაციამ გაავრცელა ინფორმაცია იმის შესახებ, რომ დეველოპერული კომპანია Emaar Properties/Eagle Hills-ი საქართველოში 6 მილიარდი აშშ დოლარის მოცულობის ინვესტიციას განახორციელებს. თანამშრომლობის მემორანდუმი კომპანიასა და ქართულ მხარეს შორის აბუ-დაბიში ოცნების ხელისუფლების პრემიერმინისტრ ირაკლი კობახიძის ვიზიტის ფარგლებში გაფორმდა.

მათვე ცნობით, უმსხვილესი დეველოპერული კომპანია Emaar Properties/Eagle Hills-ის ინვესტიციით, მსხვილი დეველოპერული პროექტები თბილისსა და გონიოში განხორციელდება.

"20 ქვეყანაში ვსაქმიანობ და ვხედავ, რომ საქართველოში ყველა მაჩვენებელი კარგია. თქვენი ქვეყანა განსაკუთრებული და გამორჩეული ბრენდია. ჩვენ გვაქვს სპეციალური ფორმულა, რომელიც კარგად ერგება ბათუმს. თუ გადახედავთ ბათუმის ზრდას ბოლო 10-15 წლის განმავლობაში, ის ძალიან საინტერესო ცენტრი ხდება. იმედი მაქვს, რომ იმით, რასაც ვაკეთებთ, როგორ ვაშენებთ საცხოვრებელ ცენტრებს, სასტუმროებსა და პარკებს და სხვა, შევძლებთ განსაკუთრებულობა შევმატოთ მას და ნამდვილად მჯერა, რომ ის შავი ზღვის ერთ-ერთი ყველაზე ლამაზი ადგილი გახდება", — აღნიშნა Emaar Properties/Eagle Hills-ის დამფუძნებელმა, მოჰამედ ალაბარმა.