ჩინეთის ვაჭრობის მინისტრის ბრძანებით, ქვეყანაში არსებული ყველა ჩრდილოკორეული კომპანია ან გაერთიანება უნდა დაიხუროს, წერს Independent. კომპანიები უნდა დაიხურონ 120 დღის განმავლობაში მას შემდეგ, რაც გაერომ 12 სექტემბერს ფხენიანის მიმართ ახალი სანქციები შეიმუშავა.

ჩინეთი ჩრდილოეთ კორეის უმსხვილესი სავაჭრო პარტნიორია. საერთაშორისო ვაჭრობის სტიმულირების სამხრეთ კორეის სააგენტოს (Kotra) მონაცემებით, პეკინისა და ფხენიანის ყოველწლიური ვაჭრობის მოცულობა ექვს მილიარდს აღწევს.

გაეროს სანქციებს, ჩინეთის გარდა, რუსეთმაც დაუჭირა მხარი. ეს უკვე სანქციების რიგით მეექვსე პაკეტია მას შემდეგ, რაც ფხენიანმა 2006 წელს ბირთვული იარაღი პირველად გამოსცადა.

მანამდე, ჩრდილოეთ კორეის მიმართ სანქციები აგვისტოში გატარდა და კრძალავდა ტყვიის, ნახშირის, ზღვის პროდუქტების იმპორტს, ფხენიანის საგარეო ვაჭრობის ანგარიშების გაყინვასა და ჩრდილოკორეული გემებისთვის პორტში შესვლას.

ახლა კი სანქციები შეეხო ჩრდილოეთ კორეის ექსპორტის სიდიდით მეორე პროდუქტს, ტექსტილს. 2016 წელს ტექსტილის ექსპორტმა ფხენიანს 752,5 მლნ დოლარი მოუტანა. ტექსტილის, თითქმის, 80 პროცენტი ჩინეთში გადის.

3 სექტემბერს ფხენიანმა წყალბადის ბომბი მეექვსედ გამოსცადა. ადგილობრივი მედიის თქმით, ცდამ წარმატებით ჩაიარა.