მსოფლიო ტურიზმის ორგანიზაციის ხელმძღვანელმა, ზურაბ პოლოლიკაშვილმა ტელეკომპანია "ფორმულას" ეთერში განაცხადა, რომ ოცნების ხელისუფლების მიერ მისი კანდიდატურის მოხსნის ერთ-ერთი მიზეზი ის გახდა, რომ ის მათ დირექტივას არ დაემორჩილა და თანამდებობიდან არ გაათავისუფლა საქართველოს ყოფილი ელჩი ჩეხეთში, თეა მაისურაძე. შეგახსენებთ, რომ თეა მაისურაძემ მანამდე პოზიცია ოცნების მიერ ევროინტეგრაციაზე უარისა და მშვიდობიან დემონსტრანტებზე ძალადობის შემდეგ დემარშით დატოვა.

ოცნების ხელისუფლების მიერ მსოფლიო ტურიზმის ორგანიზაციის ხელმძღვანელის, ზურაბ პოლოლიკაშვილის კანდიდატურის მოხსნას დღეს თეა მაისურაძე სოციალურ ქსელში ეხმაურება.

მისი თქმით, ოცნების რეჟიმისთვის მიუღებელია ყველა, ვინც ემსახურება საქართველოს ეროვნულ ინტერესებს და არა რუსეთის ინტერესებს.

"ზურაბ პოლოლიკაშვილი, გაერო-ს მსოფლიო ტურიზმის ორგანიზაციის წევრმა ქვეყნებმა, გენერალურ დირექტორად 2017 წელს აირჩიეს. ეს იყო და არის ჩვენი ქვეყნის უდიდესი წარმატება, რადგან საერთაშორისო დონეზე, ასეთ მაღალ პოზიციაზე საქართველოს წარმომადგენელი არ ჰყოლია. ამ გამარჯვებაში დიდი წვლილი მიუძღვის თავად ზურას პიროვნულ ფაქტორს. მე, იმ დროს, როგორც საგარეო საქმეთა სამინისტროს საერთაშორისო ორგანიზაციების დეპარტამენტის დირექტორი, აქტიურად ვიყავი ჩართული აღნიშნულ კამპანიაში.

ქვეყნები, მსოფლიოს მასშტაბით, უდიდეს ძალისხმევას დებენ იმაში, რომ საერთაშორისო ფორმატებში, განსაკუთრებით მაღალ და მნიშვნელოვან პოზიციებზე მაქსიმალურად იყვნენ წარმოდგენილები. ყველამ კარგად ვიცით, რომ საქართველოსთვის ტურიზმი მნიშვნელოვანია, ამ მიმართულებით ქვეყნის უდიდესი პოტენციალის გათვალისწინებით. შესაბამისად, მხოლოდ ის ფაქტიც კი, რომ ჩვენს ქვეყანას ჰყავდა თავისი წარმომადგენელი ამ პოზიციაზე, იყო უკვე დიდი წინგადადგმული ნაბიჯი, რომ არაფერი ვთქვათ იმაზე, რაც ზურას აქვს გაკეთებული საქართველოში ტურიზმის სექტორის განვითარებისთვის. აი ამ ყველაფრის ფონზე, ხდება ზურაბ პოლოლიკაშვილის, თითქმის უკვე გამარჯვებული კანდიდატის კანდიდატურის მოხსნა.

მესამე ვადით არჩევნებში მონაწილეობა დასაშვებია გაერო-ს მსოფლიო ტურიზმის ორგანიზაციაში და შესაბამისი პრეცედენტიც არსებობს.

რაც შეეხება რეჟიმის მითითებებს და გადაწყვეტილებებს, რეჟიმისთვის მიუღებელია ყველა, ვინც ემსახურება საქართველოს ეროვნულ ინტერესებს და არა რუსეთის ინტერესებს," — წერს თეა მაისურაძე.

15 მაისის ზურაბ პოლოლიკაშვილმა ფორმულას ეთერში აღნიშნულ პოსტზე მისი კანდიდატურის ერთ-ერთ მიზეზად სწორედ ოცნების დირექტივის არ შესრულება დაასახელა.

"თეა მაისურაძე, საქართველოს ჩეხეთში ელჩი, ხელშეკრულებით ავიყვანე რამდენიმე თვით, რათა კამპანიაში დახმარებოდა. მდინარაძე რომ სამ თხოვნაზე საუბრობს, ერთ-ერთი მათგანი თეას თანამდებობიდან მოხსნა იყო. მე ავუხსენი, რომ ეს მარტივი პროცესი არ იქნებოდა. ამაზე კი დიდი ისტერიკა ატყდა და ამის გამო, თეამ თავისი ინიციატივით შეწყვიტა მუშაობა. ისინი თეას ფაქტზე ნაწყენები იყვნენ, რაც გამოიხატებოდა იმაში, რომ ხმების მოგროვებაში საერთოდ არ მეხმარებოდნენ", — განაცხადა პოლოლიკაშვილმა ფორმულას ეთერში.

ის ოცნების მაღალჩინოსნების ბრალდებებს გამოეხმაურა და განაცხადა, რომ ითხოვს განმარტებას — რა არის ანტისახელმწიფოებრივი მის ქმედებებში, რაც მისი კანდიდატურის მოხსნის მიზეზი გახდა.

"გაბრაზებულზე არ მინდა ვინმეს კრიტიკა დავიწყო. მე მინდა გავიგო ერთი რაღაცა, რატომ გამოიწვიეს ეს ჩემი კანდიდატურა, რის ფასად და ასე ჩუმად. მე არავინ არ მეტყვის და არც მაქვს ამის ილუზია, მაგრამ მე მაქვს ვალდებულებები მინისტრებთან, ქვეყნებთან. ეს არის ქართული რეპუტაციის დასასრული. მსოფლიო ტურიზმის რუკაზე დაჯდა საქართველო ჩემ გამო. მე ჩემი ქვეყანა მიყვარს და ნუ მაბრალებენ, რომ ანტისახელმწიფოებრივი თხოვნები ჰქონდათ, რა მთხოვეს და არ გავაკეთე. ეს არის ტყუილი. ძალიან სერიოზული ბრალდება. ვითხოვ და ამიხსნან რა არის ანტისახელმწიფოებრივი ჩემი ქმედება, რომელიც ჩავიდინე", — განაცხადა ზურაბ პოლოლიკაშვილმა.

შეგახსენებთ, რომ ოცნების პრემიერმა კობახიძემ განაცხადა, რომ "მან [ზურაბ პოლოლიკაშვილმა] სცადა ისეთი რამ, რის გამოც არ დაიმსახურა პასუხი და დაიმსახურა მისი კანდიდატურის გამოწვევა. ის დაუპირისპირდა სახელმწიფოებრივ ინტერესებს".