"მან სცადა ისეთი რამ, რის გამოც არ დაიმსახურა პასუხი და დაიმსახურა მისი კანდიდატურის გამოწვევა. ის დაუპირისპირდა სახელმწიფოებრივ ინტერესებს", — ამის შესახებ ოცნების პრემიერმა მსოფლიო ტურიზმის ორგანიზაციის ხელმძღვანელ ზურაბ პოლოლიკაშვილის კანდიდატურის მოხსნასთან დაკავშირებით განაცხადა და დაადასტურა ისიც, რომ აღნიშნულ კანდიდატურაზე არაბთა გაერთიანებული საემიროების წარმომადგენელს დაუჭერენ მხარს.

მისი თქმით, ჯერ გადაწყვეტილება მიღებული იქნა კანდიდატურის მოხსნის თაობაზე და შემდეგ მივიღეთ გადაწყვეტილება კონკრეტული კანდიდატის მხარდაჭერის შესახებ.

"ისეთი აღქმა აქვს ვიღაც-ვიღაცებს, რომ ჩვენი ხელისუფლება კეთილშობილი დამოკიდებულებიდან გამომდინარე იმსახურებს უდიერ დამოკიდებულებას, ვიღაცებს აქვთ ამის აღქმა, რომ შეიძლება თავში ჩაარტყან ხელისუფლებას და იქიდან რეაქციაც არ უნდა მიიღონ. ჩვენ, რა თქმა უნდა, თავში ჩარტყმას თავში ჩარტყმით არ ვუპასუხებთ, მაგრამ ასეთ ქმედებებზე ყველა მიიღებს შესაბამის პასუხს და სწორედ ამას ეფუძნებოდა ის გადაწყვეტილება, რომელიც იქნა მიღებული. ეს გადაწყვეტილება არაფერ კავშირში არ არის არაბთა გაერთიანებული საემიროების წარმომადგენლის მხარდაჭერასთან, თუ რომელიმე სხვა კანდიდატის მხარდაჭერასთან. ჯერ გადაწყვეტილება მიღებული იქნა კანდიდატურის მოხსნის თაობაზე და შემდეგ მივიღეთ გადაწყვეტილება კონკრეტული კანდიდატის მხარდაჭერის შესახებ. არავითარი კავშირი არ არის ამ ორ მოვლენას შორის. რომ არ ყოფილიყო ეს უდიერი მიდგომა, თავში ჩარტყმის მცდელობა და ა.შ. ყველაფერი იქნებოდა სხვანაირად, თუმცა საბოლოო ჯამში, გამოქვეყნდა მესიჯი, რომელმაც ცხადად დაადასტურა ის, რომ უალტერნატივო იყო გადაწყვეტილება კანდიდატის გამოწვევის თაობაზე.

ეს კაცი წლის ბოლომდე არის გაეროს მსოფლიო ორგანიზაციის ხელმძღვანელი. როდესაც ასეთი კაცი, ჯერ კიდევ თანამდებობაზე მყოფი, ასეთი ლექსიკით საუბრობს საკუთარი წარმდგენი ქვეყნის ხელისუფლების თაობაზე, ეს არის უტყუარი ნიშანი იმისა, რომ ჩვენ აბსოლუტურად... პასუხს უნდა იმსახურებდე იმისთვის, რომ შემდეგ მასზე პრეტენზია გამოთქვა. როდესაც ვიღაცა ცდილობს, რომ საქართველოს ხელისუფლებას თავში ჩაარტყას, მერე პრეტენზია არ უნდა ჰქონდეს, რომ არ გპასუხობენ. მან სცადა ისეთი რამ, რის გამოც არ დაიმსახურა პასუხი და დაიმსახურა მისი კანდიდატურის გამოწვევა. ის დაუპირისპირდა სახელმწიფოებრივ ინტერესებს. არ განმარტავ უფრო მეტად, იმიტომ, რომ საქმე ეხება ადამიანს, რომელიც ჯერ კიდევ, წლის ბოლომდე იკავებს მსოფლიო ტურიზმის ორგანიზაციის ხელმძღვანელის თანამდებობას", — თქვა კობახიძემ.

შეგახსენებთ, რომ გაეროს მსოფლიო ტურიზმის ორგანიზაციის (UN Tourism) გენერალური მდივნის თანამდებობაზე ზურაბ პოლოლიკაშვილის კანდიდატურა ოცნების ხელისუფლებამ საკუთარი გადაწყვეტილებით მოხსნა.

ოცნების პრემიერმა ტელეკომპანია იმედის ეთერში განაცხადა, რომ კანდიდატის მესამედ წარდგენა "არ არის მაინცდამაინც დემოკრატიული" და ამ გადაწყვეტილების მიზეზი კონკრეტული სახელმწიფოების რეაქციები იყო. მისი თქმით, მათ საქართველოს ელჩების დაბარება დაიწყეს "ერთგვარი დემარშით იმასთან დაკავშირებით, რომ ჩვენ მესამედ წარვადგინეთ გაეროს სისტემაში კანდიდატურა".

მანამდე ტელეკომპანია ფორმულამ ზურაბ პოლოლიკაშვილის წერილი გაავრცელა. სადაც ის წერს, რომ გაეროს მსოფლიო ტურიზმის ორგანიზაციის (UN Tourism) გენერალური მდივნის კანდიდატურის მოხსნის გადაწყვეტილება ოცნებას მასთან არ შეუთანხმებია.

"თვითმფრინავში რომ ჩავჯექი, მაშინ ვნახე deep ვირთხების გადაწყვეტილება. ჩავფრინდები და ხვალ ჩაგერთვებით. მანამდე ის, რომ ეს ჩემი სურვილი იყო ან შეთანხმებული ჩემთან არის დიდი ტყუილი. კარგი იქნება თუ კობახიძე ახსნის რატომ გააკეთა ეს.

3 კვირაა და მეტი ვწერ, ვურეკავ და იმალება, გამოვიდეს და თქვას, რაში გაცვალა ჩემი კანდიდატურა! მე არ წარმოვადგენ არც deep states და არც გლობალურ ომის პარტიას — მე ვარ ქართველი გაეროს მსოფლიო ტურიზმის გენერალური მდივანი," — წერია მის შეტყობინებაში.

14 მაისს გამოქვეყნებულ სტატიაში The Diplomat ოცნების მიერ ზურაბ პოლოლიკაშვილის მოხსნის სხვა შესაძლო მოტივებზე წერს. მათი თქმით, "გენერალური მდივანი პოლოლიკაშვილი ხელმძღვანელობდა მთელ პროცესს, რომელმაც შეაჩერა რუსეთის წევრობის შეჩერება აღნიშნულ ორგანიზაციაში 2022 წელს უკრაინაში შეჭრის შემდეგ — ეს იყო თამამი პოზიცია, რომელმაც პრეცედენტი შექმნა გაეროს სისტემაში. მისი ქმედებები რუსეთის მიერ უკრაინაში შეჭრის წინააღმდეგ მნიშვნელოვან მორალურ პოზიციად იქნა მიჩნეული, განსაკუთრებით ახლა, როდესაც რუსეთი არ დათანხმდა უკრაინასთან ცეცხლის შეწყვეტას". სტატიაში ასევე აღნიშნულია, რომ "ამ ნაბიჯმა სერიოზული შეშფოთება გამოიწვია საერთაშორისო ტურისტულ საზოგადოებაში, რადგან, როგორც ჩანს, ეს საქართველოს სტრატეგიულ გაერთიანებას წარმოადგენს რუსეთის ფედერაციასთან".

ცნობისათვის, 2009–2011 წლებში ზურაბ პოლოლიკაშვილი საქართველოს ეკონომიკისა და მდგრადი განვითარების განვითარების მინისტრი იყო. 2018 წლის 1-ელი იანვრიდან კი მსოფლიო ტურიზმის ორგანიზაციის გენერალური მდივანია.