მოზამბიკში საპროტესტო აქციები პოლიციასთან შეტაკებაში გადაიზარდა. აქციების მიზეზი არჩევნების შესაძლო გაყალბებაა. პოლიციასთან შეტაკებას 7 ნოემბრის მონაცემებით, სულ მცირე, 3 ადამიანი შეეწირაა, 66 კი დაშავდა.

ზოგი ვერსიით, აქციის მონაწილეებსა და პოლიციელებს შორის დაპირისპირების შედეგად დღემდე ჯამში, სულ მცირე, 18 ადამიანი დაიღუპა.

"66 დაშავებულიდან, 57, სავარაუდოდ, ცეცხლსასროლი იარაღით იყო დაჭრილი, ხოლო 4 დაცემისგან, 3 ფიზიკური აგრესიის შედეგად, 2 კი ბასრი იარაღით დაზიანდა", —განაცხადა მოზამბიკის დედაქალაქ მაპუტოს ცენტრალური საავადმყოფოს ზრდასრულთა სასწრაფო მომსახურების დირექტორმა, დინო ლოპესმა.

მოზამბიკის მმართველი პარტია, ფრელიმო, ქვეყანას 1975 წლიდან მართავს. აქციის მონაწილეები ამბობენ, რომ არჩევნები გაყალბებულია და ფრელიმოს წინააღმდეგ დღემდე ყველაზე მასშტაბურ პროტესტს მართავენ. არჩევნების გაყალბებაზე საუბრობენ სამოქალაქო საზოგადოების ჯგუფები და საერთაშორისო დამკვირვებლებიც, რომელთა თქმით, არჩევნებმა დემოკრატიული სტანდარტი ვერ დააკმაყოფილა.

Reuters-ის ცნობით, პოლიციელები აქციის მონაწილეების მიმართულებით ცეცხლსასროლ იარაღს განურჩევლად ისროდნენ. ქვეყნის შინაგან საქმეთა მინიტრმა პოლიციის ქმედებები გაამართლა.