20 ოქტომბერს, მსვლელობის "საქართველო ირჩევს ევროკავშირს" პარალელურად, თბილისის მერიამ ზღვისუბანში ახალი პარკი გახსნა და ამასთან დაკავშირებით კონცერტიც გამართა.

კონცერტი ყურადღების ცენტრში რამდენიმე დღის წინ მოექცა, როცა ჯგუფმა "მგზავრებმა", საზოგადოების უარყოფითი რეაქციის გამო, მასში მონაწილეობაზე უარი თქვა. სავარაუდოდ, მარშში მონაწილეობის გამო, ამ ღონისძიებისთვის თვალის მიდევნება ვერ შეძელით — შესაბამისად, შემოგთავაზებთ 5 ფაქტს, რომელიც გამოტოვეთ.

1. გავიცანით ჯგუფი "მიქსტურა"

"მგზავრების" უარის შემდეგ, როგორც ჩანს, თბილისის მერიას დრო არ დაუკარგავს. კონცერტზე (სხვა შემსრულებლების) კარგად ნაცნობი სიმღერები ჯგუფმა "მიქსტურამ" შეასრულა.

2. მადლობა ჯგუფ "მიქსტურას"

თბილისის მერმა, კახა კალაძემ, ჯგუფ "მიქსტურას" "უმაგრესი" უწოდა და მადლობა გადაუხადა ჩართულობისთვის, მხარდაჭერისთვისა და თანადგომისთვის.

3. "მიქსტურამ" ახალ წელზე გვიმღერა

თბილისის მერიის "თანამდგომმა და მხარდამჭერმა" ბენდმა არაერთი ცნობილი სიმღერა შეასრულა, თუმცა ყველაზე საინტერესო ნიკოლშოუს "საღამო" იყო, რომლითაც "მიქსტურამ" მერაია ქერის დაასწრო და ოქტომბერში დამდეგი ახალი წელი შეგვახსენა.

4. კახამ პირობა არ შეასრულა

გულდასაწყვეტი იყო ფაქტი, რომ თბილისის მერმა რამდენიმე დღის წინ დადებული პირობა არ შეასრულა — კახა კალაძე "მგზავრების" უარის შემდეგ, თავად სიმღერას შეგვპირდა, თუმცა დღეს ეს სიტყვა გადაავადა.

5. მერმა თავად გადაამოწმა შესრულებული სამუშაოები

ღონისძიების პირველი ნაწილი სრულად ზედამხედველობის სამუშაოებს დაეთმო, როცა კახა კალაძემ პარკის შესახებ ყველა დეტალი გამოიკითხა და ზღვისუბნის წარსულიც გაიხსენა.

ფოტო: იმედი