ოკუპირებული აფხაზეთის ე.წ. საგარეო საქმეთა მინისტრის სერგეი შამბას განცხადებით, თუ საქართველო "ჩადენილის" გამო ბოდიშს მოიხდის, აფხაზეთში ამ ნაბიჯს მიესალმებიან. ამის შესახებ შამბამ ჟენევის დისკუსიების თანათავმჯდომარეებთან შეხვედრაზე განაცხადა.

შამბამ ხაზი გაუსვა იმასაც, რომ "აფხაზეთის რესპუბლიკის პოლიტიკური სტატუსი არავითარ განხილვას არ ექვემდებარება". მისი სიტყვებით, აფხაზური მხარისთვის ჟენევის დისკუსიების დღის წესრიგში "საომარი მოქმედებების განუახლებლობისა და აფხაზეთის რესპუბლიკასა და საქართველოს შორის სამშვიდობო შეთანხმების ხელმოწერა" ყველაზე მნიშვნელოვანი საკითხებია.

ჟენევის საერთაშორისო მოლაპარაკებები 2008 წლის აგვისტოს ომის შემდეგ ცეცხლის შეწყვეტის შეთანხმების შესაბამისად შექმნილი ფორმატია. თავიდან ის წელიწადში ოთხჯერ ტარდებოდა, თუმცა პერიოდულობა, სხვადასხვა მიზეზით, არაერთხელ დაირღვა.