დეტალები: თელავის სახელმწიფო თეატრის სამხატვრო ხელმძღვანელმა, პაატა გულიაშვილმა On.ge-ს დაუდასტურა, რომ ღიად პრორუსულ და ძალადობრივ ალტ-ინფოს შეხვედრის გამართვისთვის თეატრის შენობა დაუთმეს.

• მისი თქმით, თეატრის სივრცე იჯარით გაიცა.
• "როგორც ყველა სხვა შემთხვევაში, გადაიხადეს თანხა და ჩაატარეს ღონისძიება", — გვითხრა პაატა გულიაშვილმა.
• On.ge შეეცადა გაეგო გულიაშვილის მოსაზრება, რას ნიშნავს, როდესაც სახელმწიფოს მიერ დაფინანსებული თეატრი ადგილს უთმობს აგრესიულ, ჰომოფობიურ და პრორუსული ჯგუფს. თუმცა, მან ჩვენთან სატელეფონო საუბარი შეწყვიტა.

რა ხდება: დემოკრატიის კვლევითი ინსტიტუტის (DRI) ცნობით, თელავის სახელმწიფო თეატრმა პრორუსულ, ძალადობრივ მოძრაობა ალტ-ინფოს თეატრის შენობა შეხვედრისთვის დაუთმო 2023 წლის პირველ ოქტომბერს. ეს თეატრი საჯარო სამართლის იურიდიული პირია და სახელმწიფოსგან ფინანსდება.

• ორგანიზაცია წერს, ღიად პრორუსული ძალადობრივი დაჯგუფება 2024 წელს საპარლამენტო არჩევნებში მონაწილეობის მიღებისთვის ემზადება.
• შეხვედრისთვის კი სივრცეს სახელმწიფოს დაფინანსებაზე მყოფი საჯარო სამართლის იურიდიული პირებიც უთმობენ.

• "ხელისუფლების დამოკიდებულება ძალადობრივი პრორუსული დაჯგუფების მიმართ ხაზგასმით ლოიალურია, ძალადობრივ ორგანიზაციას შეხვედრებისთვის ფართს უთმობს თელავის სახელმწიფო თეატრი", — განაცხადა ორგანიზაციამ, რომელიც ძალადობრივი პოლიტიკური მოძრაობის შესახებ მონიტორინგს აწარმოებს.

კონტექსტი: 18 სექტემბრის სუს-ის განცხადების შემდეგ, ულტრამემარჯვენე რადიკალური მოძრაობის, ალტ-ინფოს ლიდერებმა ანტიმაიდანი დააანონსეს.

25 სექტემბერს გამართულ ბრიფინგზე პრორუსული დაჯგუფების ლიდერებმა განაცხადეს, რომ აუცილებელია თანამოაზრეთა მობილიზაცია და საქართველოს მასშტაბით ორგანიზებული, შეკრული დაჯგუფებების შექმნა.

რატომ არის მნიშვნელოვანი? თელავში შეხვედრა 2023 წლის პირველ ოქტომბერს, თელავის ვაჟა ფშაველას სახელობის სახელმწიფო პროფესიულ დრამატულ თეატრში ჩატარდა. ეს თეატრი საჯარო სამართლის იურიდიული პირია და სახელმწიფოსგან ფინანსდება.

დემოკრატიის კვლევის ინსტიტუტი მოუწოდებს ხელისუფლებას:

• შეწყვიტოს ძალადობრივი ჯგუფების წახალისება;
• უარი თქვას ძალადობრივი ჯგუფებისთვის შეხვედრების და სამუშაო სივრცის დათმობაზე;
• ადეკვატურად შეაფასოს პრორუსული ძალადობრივი ჯგუფების გამსხვილებისგან და გაზრდილი ლეგიტიმაციიდან მომდინარე საფრთხეები;
• სისხლისსამართლებრივ პასუხისმგებლობაში მისცეს 2021 წლის 5 ივლისის და 2023 წლის 8 ივლისის ორგანიზატორები.

მოვლენების ქრონიკა: DRI-ის მონიტორინგის მიხედვით,

• ძალადობრივმა ჯგუფმა რეგიონული შეხვედრები პირველ ოქტომბერს დაიწყეს.
• შეხვედრები გამართეს ოთხ ქალაქში: თელავი, გორი, რუსთავი და მცხეთა.

რა უნდა გვახსოვდეს ალტინფოს შესახებ:

• ალტ-ინფო პრორუსული, ანტიდასავლური, ძალადობრივი დაჯგუფებაა.
• გამუდმებით ავრცელებენ ანტიდასავლურ გზავნილებს, ასევე, პრორუსულ ნარატივებს, რომლებიც ხშირად კრემლის სტრატეგიულ გზავნილებთან თანხვედრაშია.
• სწორედ ამ ჯგუფებმა დააორგანიზეს ძალადობა, დაარბიეს აქტივისტების ოფისები, იძალადეს 50-ზე მეტ ჟურნალისტზე — 5 ივლისს ნაცემი ოპერატორი ლექსო ლაშქარავა გარდაიცვალა.
• TI-ს ანგარიშით, 2022 წლის ბოლო სამ თვეში ყველაზე მეტი თანხა ქართული ოცნების შემდეგ, პრორუსულ ალტ-ინფოს შესწირეს.
• მათი ძალადობრივი იდეები ვრცელდება მათივე ტელევიზიითა და სხვა პროპაგანდისტული არხებით სოციალურ ქსელებში.

არქივი: პრორუსები მცხეთაში შეიკრიბნენ, რომ სუს-ის მიერ დაანონსებულ საფრთხეებზე იმსჯელონ.