რატომ არის მნიშვნელოვანი: გასულ წელს უკრაინამ წარმატებული კონტრშეტევა განახორციელა და რუსული ძალები კიევიდან ჩრდილო-აღმოსავლეთის, ასევე, სამხრეთით, ხერსონის რეგიონის ტერიტორიებზე დაამარცხა.

• ოკუპანტები კვლავ იკავებენ აღმოსავლეთის, სტრატეგიულად მნიშვნელოვანი სამხრეთისა და ყირიმის ნახევარკუნძულის ნაწილებს.
• მორიგი კონტრშეტევა უკრაინამ ზაფხულში წამოიწყო — ოფიციალური პირები ფრონტის ხაზზე გარკვეულ წინსვლაზე საუბრობენ.
• უკრაინის თავდაცვის სამინისტროს ინფორმაციით, მათმა შეიარაღებულმა ძალებმა დონეცკის ოლქის სოფელი უროჟაინოე გაათავისუფლეს.
• როგორც Forbes წერს, კონტრშეტევის 13 კვირის განმავლობაში უკრაინის არმიამ 71 ლეოპარდიდან მხოლოდ 5 დაკარგა, 10 კი დაზიანდა.

აზოვის ბატალიონის დაბრუნება: კონტრშეტევის პროცესში ეს ერთ-ერთ მნიშვნელოვანი მოვლენა იყო, როგორც სიმბოლური, ასევე სტრატეგიული თვალსაზრისით.

• შეგახსენებთ, რომ აზოვსტალის მცველები რუსეთმა ტყვედ 2022 წლის 17 მაისს აიყვანა, ამავე წლის სექტემბერში, რუსეთსა და უკრაინას შორის სამხედრო ტყვეების გაცვლის პირობებით, აზოვის მებრძოლები, მათ შორის, მეთაური, დენის პროკოპენკო, თურქეთში გაგზავნეს.

• ისინი ომის დასრულებამდე იქ უნდა დარჩენილიყვნენ, თუმცა 2023 წლის ივლისში აზოველები თურქეთში მყოფ ვლადიმირ ზელენსკისთან ერთად სამშობლოში დაბრუნდნენ.

• 17 აგვისტოს, ცნობილი გახდა, რომ აზოვის ბატალიონი აღდგა და ფრონტის ხაზზე დაბრუნდა.
• უკრაინის ეროვნული გვარდიის წარმომადგენლის თქმით, აზოვის მებრძოლები საიმედოდ იკავებენ თავიანთ პოზიციებს და გამანადგურებელ ზარალს აყენებენ მტერს.

კონტრშეტევა: რაც შეეხება უკრაინის არმიის წინსვლას, ეს საკითხი უწყვეტი განხილვისა და კრიტიკის მიზეზი ხდება, რადგან წინა კონტრშეტევის მსგავსად, საზოგადოება სწრაფ შედეგებს ელის.

• ნატოს გენერალურმა მდივანმა იენს სტოლტენბერგმა მოუწოდა ყველას, არ იჩქარონ დასკვნების გამოტანა უკრაინის კონტრშეტევაზე და აღნიშნა, რომ უკრაინამ არაერთხელ გადააჭარბა მოლოდინს.
• ესტონეთის თავდაცვის ძალების სადაზვერვო ცენტრი აღნიშნავს, რომ ყველაზე მნიშვნელოვანი მოვლენები ახლა რობოტინოს მიდამოებში ვითარდება, ორეხოვსკის მიმართულებით.
• ბრიტანეთის თავდაცვის სამინისტროს აზრით, რუსეთის ფედერაცია რისკავს, როცა ძალებს ყოფნს და კუპიანსკისკენ გადაყავს, როცა ორეხოვსკის მიმართულებით ბრძოლა ჯერ კიდევ გრძელდება.

ბოლო სიახლეები: რუსებმა განაცხადეს, რომ უკრაინამ ყირიმის ხიდზე თავდასხმა სცადა, მაგრამ 3 დრონი ჩამოაგდეს.

• ოკუპანტებმა ღამით დაბომბეს ხერსონი, რის შედეგადაც 2 ადამიანი დაშავდა.
• დღეს კი გავრცელდა ინფორმაცია, რომ დაბომბეს ხერსონის ოლქის მარჯვენა სანაპირო, კერძოდ, ბერისლავისა და ხერსონის ოლქების დასახლებები, რასაც 2 ადამიანი ემსხვერპლა.
• უკრაინის გენერალური შტაბის მონაცემებით, ბოლო 24 საათი 570 ოკუპანტი მოკლეს და 30 საარტილერიო სისტემა გაანადგურეს.
• მათივე ინფორმაციით, გასული დღის განმავლობაში, რუსებმა ოთხი მიმართულებით, სცადეს შეტევა მაგრამ უშედეგოდ.
• აფეთქებების ხმა ისმოდა კრივი რიჰში, თუმცა უკრაინა ამბობს, რომ საჰაერო თავდაცვის სისტემამ თავდასხმა წარმატებით მოიგერია.