ამის შესახებ უკრაინის ეროვნული გვარდიის წარმომადგენელმა, პოლკოვნიკმა ნიკოლაი ურშალოვიჩმა განაცხადა.

რატომ არის მნიშვნელოვანი: აზოვის ბატალიონი 2014 წელს, დონბასის კონფლიქტის დროს შეიქმნა, მოგვიანებით კი უკრაინის რეგულარული არმიის ნაწილად იქცა.

  • უკრაინაში სრულმასშტაბიანი ომის დაწყების შემდეგ აზოვის მებრძოლები შეუპოვრობისა და სიმამაცის სიმბოლოებად იქცნენ.
  • ომის საწყის თვეებში ისინი თავდაცვის პოზიციებს მარიუპოლში, აზოვსტალის ქარხანაში ინარჩუნებდნენ.
  • 2022 წლის 17 მაისს აზოვსტალის მცველები რუსეთმა ტყვედ აიყვანა, ამავე წლის სექტემბერში, რუსეთსა და უკრაინას შორის სამხედრო ტყვეების გაცვლის პირობებით, აზოვის მებრძოლები, მათ შორის, მეთაური, დენის პროკოპენკო, თურქეთში გაგზავნეს.
  • ისინი ომის დასრულებამდე იქ უნდა დარჩენილიყვნენ, თუმცა 2023 წლის ივლისში აზოველები თურქეთში მყოფ ვლადიმირ ზელენსკისთან ერთად სამშობლოში დაბრუნდნენ.
  • რუსეთმა თურქეთი და უკრაინა შეთანხმების დარღვევაში დაადანაშაულა.

დეტალები: უკრაინის ეროვნული გვარდიის წარმომადგენლის თქმით, აზოვის მებრძოლები საიმედოდ იკავებენ თავიანთ პოზიციებს და გამანადგურებელ ზარალს აყენებენ მტერს.

  • "ლეგენდარული აზოვის სპეციალური დანიშნულების ბრიგადა აღდგენილია და დაიწყო საბრძოლო მისიების შესრულება სერებრიანსკის სატყეო ზონაში", — განაცხადა ურშალოვიჩმა.

კონტრშეტევა, რომელიც უკრაინამ ზაფხულში წამოიწყო, გრძელდება.

  • ომში მყოფი ქვეყნის ოფიციალური პირები ფრონტის ხაზზე წინსვლაზე საუბრობენ.
  • უკრაინის თავდაცვის სამინისტროს ინფორმაციით, მათმა შეიარაღებულმა ძალებმა დონეცკის ოლქის სოფელი უროჟაინოე გაათავისუფლეს.

  • ამის შესახებ უკრაინის თავდაცვის მინისტრის მოადგილემ, ანა მაილიარმა ტელეგრამზე განაცხადა.

  • მანვე თქვა, რომ უკრაინელი სამხედროები აგრძელებენ შეტევით მოქმედებებს.

  • უროჟაინოეში მდებარეობდა რუსული არმიის გამაგრებული პოზიციები, რომელთა შტურმიც უკრაინელებმა აგვისტოს დასაწყისში წამოიწყეს.

  • ფრონტის ხაზზე კიევის მიღწევები რუსეთს დაკავებული პოზიციებიდან სამხედრო ძალების გადასროლას აიძულებს.