საქართველოს შინაგან საქმეთა სამინისტრომ განსაკუთრებით დიდი ოდენობით ნარკოტიკული საშუალების შეძენა-შენახვის ბრალდებით სარფში ერთი პირი დააკავეს. ამის შესახებ ინფორმაციას შსს-ს პრესსამსახური ავრცელებს.

შსს-ში ამბობენ, რომ სამართალდამცველებმა დაკავებულის პირადი ჩხრეკისას, 81 აბი „სუბოქსინი“ ამოიღეს. მათი ინფორმაციით, ექსპერტიზის დასკვნით, ამოღებული სუბოქსინი 0,634542 გრამ ბუპრენორფინს შეიცავს.

გამოძიება განსაკუთრებით დიდი ოდენობით ნარკოტიკული საშუალების შეძენა-შენახვის საქმეზე მიმდინარეობს საქართველოს სისხლის სამართლის კოდექსის 260-ე მუხლის მეექვსე ნაწილის "ა" ქვეპუნქტით. ამ მუხლით, განსაკუთრებული დიდი ოდენობით ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღება ისჯება თავისუფლების აღკვეთით ვადით რვიდან ოც წლამდე ან უვადო თავისუფლების აღკვეთით.