ახალგაზრდა იურისტთა ასოციაციის განცხადებით, პირი 2011 წელს 8 გრამი მარიხუანას ფლობის ბრალდებით დააკავეს და 3 წლით თავისუფლების აღკვეთა და 2000-ლარიანი ჯარიმა მიუსაჯეს.

რატომ არის მნიშვნელოვანი: ის 2011 წლის 26 ივნისს ეჭვის საფუძველზე დააკავეს, თითქოს ნარკოტიკული საშუალების ზემოქმედების ქვეშ იმყოფებოდა

  • პირი ამტკიცებდა, რომ მას ნარკოტიკული საშუალება (მარიხუანა) პოლიციელებმა ჩაუდეს.
  • საიას განცხადებით, ექსპერტიზამ დაადგინა, რომ მომჩივანი ნარკოტიკული საშუალებების ზემოქმედების ქვეშ ტესტირების მომენტში არ იყო, თუმცა, მის შარდში აღმოჩნდა კანაბისის კვალი.
  • ორგანიზაციაში აცხადებენ იმასაც, რომ პოლიციელებმა მომჩივანს ოპერატიული ინფორმაციის საფუძველზე, სასამართლოს განჩინების გარეშე, ჩაუტარეს პირადი ჩხრეკა, ჩხრეკის პროცესს კი მოწმეები არ დასწრებიან.
  • ჩხრეკის ოქმის მიხედვით, მომჩივნის ფეხსაცმლიდან ამოიღეს ორი პაკეტი, რომელშიც მწვანე ფერის ნივთიერება იყო მოთავსებული.

დეტალები: 2021 წლის 17 ივნისს საქმეზე სტრასბურგის სასამართლომ დაადგინა, რომ მომჩივანმა ვერ შეძლო სამართლიანი სასამართლოს უფლებით სარგებლობა.

  • ამ გადაწყვეტილების შემდეგ კი, საიამ შუამდგომლობით მიმართა თბილისის სააპელაციო სასამართლოს განაჩენის გადასინჯვის მოთხოვნით, რის შემდეგად სააპელაციო სასამართლომ გამამართლებელი განაჩენი გამოიტანა.