მიუხედავად ამისა, გამოცემა ხაზს უსვამს, რომ ვიდეოებიდან შეუძლებელია იმის დადგენა, თუ რა ვითარებაში დახოცეს ტყვეებად ჩაბარებული პირები.

რატომ არის მნიშვნელოვანი: გასულ კვირას რუსულ სოციალურ მედიაში გავრცელდა ვიდეო, რომელშიც, მოსკოვის მტკიცებით, უკრაინელი სამხედროების მიერ რუსი ტყვეების დახვრეტაა ასახული.

• ვიდეოს ავთენტურობა ოფიციალურად დადგენილი არ არის, არც ის, თუ სად და როდისაა გადაღებული, თუმცა მოსკოვმა სავარაუდო მომხდარი უკვე შეაფასა ომის დანაშაულად და საერთაშორისო ორგანიზაციებს გამოძიების თხოვნით მიმართა.
• მოგვიანებით, საქმის გამოძიების მოწოდებით უკრაინაში გაეროს ადამიანის უფლებათა სადამკვირვებლო მისიაც გამოვიდა.

რა ჩანს ვიდეოში: კადრებში ნაჩვენებია უკრაინის შეიარაღებული ძალების უნიფორმაში გამოწყობილი კაცი, რომელმაც ცეცხლი გახსნა, ხოლო, სავარაუდოდ, რუსი სამხედრო მოსამსახურეები მიწაზე წვანან. ამის შემდეგ კამერა ძირს ეცემა და ისმის სროლის ხმა.

• ვიდეოს მეორე, 8-წამიან ფრაგმენტში კი, სავარაუდოდ, რუსი სამხედროების ცხედრებია ნაჩვენები.
• ამერიკული გამოცემის ცნობით, ვიდეოს ორი წყარო ჰყავს: უსახელო უკრაინელი სამხედრო, რომელიც მაკიივკასთვის ბრძოლაზე მობილური ტელეფონის ვიდეოდღიურებს იღებდა და უპილოტო საფრენი აპარატები, რომლებითაც უკრაინული ძალები შეტევას აკონტროლებდნენ.

დეტალები: The New York Times-მა ვიდეოკადრები ამერიკული კომპანიის, Maxar Technologies მიერ მიწოდებული სატელიტური გადაღების ფოტოებს შეადარა და დაადგინა, რომ ვიდეო, სავარაუდოდ, ლუგანსკის ოლქში, სვატოვოს მახლობლად, სოფელ მაკიივკაშია გადაღებული.

• მათივე ინფორმაციით, ვიდეოზე ასახული ეზოს, სახლის, ფარდულებისა და ღობეების პოზიცია თანამგზავრულ სურათებს ემთხვევა.
• გამოცემის ცნობით, ბოლო რუსმა სამხედრომ, სავარაუდოდ, წინააღმდეგობის გაწევა სცადა და სროლა ამის შემდეგ დაიწყო.
• სპეციალისტი ომის დანაშაულების საკითხებში, ივა ვუკუსიჩი New York Times-თან ინტერვიუში ამბობს, რომ ვიდეომასალის მიხედვით, შეუძლებელია იმის დადგენა, ტყვეები ორმხრივი ცეცხლის დროს დახოცეს თუ სროლის შეწყვეტის შემდეგ.

რას ამბობს უკრაინული მხარე: ვიცეპრემიერმა, ოლგა სტეფანიშინამ უსაფრთხოების საერთაშორისო ფორუმზე განაცხადა, რომ ამ კადრებს შეისწავლიან.

• მისი განცხადებით, "ძალიან ნაკლებად სავარაუდოა", რომ ამ მოკლე, რედაქტირებულ ფრაგმენტებში ნაჩვენები იყოს ის, რაზეც მოსკოვი საუბრობს.
• "ყოველი პოტენციური სიკვდილით დასჯილი რუსი ჯარისკაცი არის უკრაინელი, რომლის გაცვლაც შეუძლებელია, ამიტომ აქ ლოგიკა არ არსებობს", — ამბობს ვიცეპრემიერი.

უკრაინის ომბუდსმენის, დიმიტრი ლუბინეცის თქმით, თუ რუსმა სამხედრო ტყვეებმა, როგორც ვიდეოდან ჩანს, განაცხადეს ჩაბარების განზრახვა, მაგრამ შემდეგ ერთმა მათგანმა გახსნა ცეცხლი, მაშინ საპასუხო ცეცხლი არ შეიძლება, ჩაითვალოს სამხედრო დანაშაულად.

• მისი განცხადებით, ასეთ შემთხვევაში რუსი სამხედროები არ არიან ტყვეები, არამედ იბრძვიან.
• "უკრაინის ტერიტორიაზე რუსი სამხედრო მოსამსახურეების დაღუპვის ერთადერთი მიზეზი არის რუსეთის ფედერაციის დანაშაულებრივი პოლიტიკა, რომელმაც წამოიწყო გაუმართლებელი გენოციდური ომი უკრაინელი ხალხის წინააღმდეგ", — განაცხადა მან.