ამის შესახებ შალვა ხაჭაპურიძემ ჟურნალისტებთან ისაუბრა.

რატომ არის მნიშვნელოვანი: სააკაშვილის ადვოკატმა, ვალერი გელბახიანმა 19 ნოემბერს თქვა, რომ ბიოფსიური კვლევით აღმოჩენილი ნიშნები მიუთითებენ, რომ ყოფილი პრეზიდენტი მოწამლულია.

  • დღეს, 21 ნოემბერს ექსპრეზიდენტმა დაწერა, რომ ამ თემაზე სპეკულაციები უადგილოა და საკითხის ზედმეტი პოლიტიზება საჭირო არ არის.
  • მისივე თქმით, არასდროს არცერთი ადვოკატისთვის უთქვამს, რომ ეჭვი მოწამვლაზე აქვს.

დეტალები: მისი თქმით, ეკუთვნის თუ არა პოსტი ექსპრეზიდენტს, ამას გაარკვევს და დასძენს, რომ სააკაშვილს ჯანმრთელობის მდგომარეობა არ აძლევს საშუალებას, "რამე პოსტები აქვეყნოს".

  • ხაჭაპურიძის თქმით, მისი მხრიდან არასდროს გაჟღერებულა ინფორმაცია, რომ ექსპრეზიდენტი, შესაძლებელია მოწამლული იყოს, რადგან, როგორც განმარტავს, ეს იურიდიული დეფინიცია და დანაშაულია.

მისივე განცხადებით, გარკვეული ნივთიერებები სააკაშვილის ორგანიზმში ამერიკელი ექსპერტების ჩატარებული ტოქსიკოლოგიური ექსპერტიზის შედეგად გამოვლინდა, თუმცა ელოდებიან პასუხს, თუ რა ნივთიერებზეა საუბარი.

  • ასევე, ამბობს, რომ მინერალები სააკაშვილის ორგანიზმში, შესაძლოა სხვადასხვა მედიკამენტის მიღების გამო აღმოჩენილიყო.
  • "რამდენიმე წამალი მიეწოდება ისეთი, რომელიც ჩვენი აზრით, არ უნდა მიეწოდებოდეს".
  • "ხმამაღლა ვაცხადებთ, რომ სპეკულაციები უნდა შეწყდეს. ეს ისეთი თემა, რომ ყოველგვარი გადახრილი სიტყვაც კი, შეიძლება, ძალიან ცუდად იყოს საზოგადოების მხრიდან აღქმული".

იუსტიციის სამინისტრო: გუშინ იუსტიციის მინისტრი რატი ბრეგაძე მიხეილ სააკაშვილის ადვოკატის განცხადებას გამოეხმაურა. მისი თქმით, მსგავსი ტიპის ინფორმაციის გავრცელებამდე უნდა მოიტანონ შესაბამისი მტკიცებულებები.

  • "მსგავსი დასკვნა სპეციალური პენიტენციური სამსახურისთვის არავის წარუდგენია და საზოგადოების არასწორი ინფორმირების თავიდან არიდების მიზნით მოვუწოდებთ ყველას, რომ თავი შეიკავონ არასწორი და ფაქტებით გაუმყარებელი ინფორმაციის გავრცელებისგან", — თქვა მინისტრმა.
  • მისივე თქმით, აპირებს სამხარაულის ეროვნულ ცენტრს მიმართოს ტოქსიკოლოგიური ექსპერტიზისთვის, რათა საზოგადოებას ჰქონდეს სრული და ამომწურავი მიხეილ სააკაშვილის ჯანმრთელობის მდგომარეობაზე.