გენერალური ასამბლეის მესამე კომიტეტმა რეზოლუციის პროექტი 16 ნოემბერს დაამტკიცა.

რატომ არის მნიშვნელოვანი: რეზოლუციას 78 ქვეყანამ დაუჭირა მხარი, 28 წინააღმდეგი იყო, 68-მ კი თავი შეიკავა. რაც შეეხება საქართველოს, მას პროექტის კენჭისყრაზე პოზიცია არ დაუფიქსირებია.

  • გაერო მოუწოდებს ირანს, შეწყვიტოს გადამეტებული ძალის გამოყენება მშვიდობიანი მომიტინგეების მიმართ.
  • მიმდინარე წელს, თითქმის ორთვიანი ანტისამთავრობო საპროტესტო გამოსვლების შედეგად, 15 000-ზე მეტი ირანელი დააკავეს და რამდენიმე ასეული მოკლეს.
  • ირანის სასამართლომ ერთ-ერთ აქციის მონაწილეს სასიკვდილო განაჩენიც კი გამოუტანა.

ფოტო: კადრი ვიდეოდან

დეტალები: დღეს, 21 ნოემბერს დროას წევრმა, გიგა ლემონჯავამ ბრიფინგი გამართა და თქვა, რომ კენჭისყრის დროს საქართველოს წარმომადგენლობამ დარბაზი დატოვა.

  • მისი განცხადებით, ცივილიზაციების დაპირისპირებაში ქართულმა ოცნებამ აირჩია ავტორიტარიზმის გზა.
  • "ხელისუფლება არ გამოხატავს ქართველი ხალხის უდიდესი უმრავლესობის ნებას, რადგან იგი ქვეყანას თავისუფლებისა და ევროატლანტიკურ გზაზე გაძღოლის მაგივრად რუსული ტიპის ავტორიტარიზმში ითრევს";
  • "ქართული ოცნება ემეგობრება მათ, ვისაც ემეგობრება რუსეთი, ხოლო ჩვენს სტრატეგიულ პარტნიორებს ლანძღავს ისევე, როგორც რუსეთი", — აღნიშნა მან.

On.ge დამატებითი ინფორმაციისთვის, საგარეო საქმეთა სამინისტროს დაუკავშირდა.

  • უწყების პასუხს მიღებისთანავე შემოგთავაზებთ.