პარტია გირჩის დეპუტატი იაგო ხვიჩია ფიქრობს, რომ თავადაა ერთადერთი ომბუდსმენობის კანდიდატი, რომელიც შეიძლება, კონსენსუსით აირჩეს.

რატომ არის მნიშვნელოვანი: ევროკავშირის მიერ გაცემულ 12 რეკომენდაციაში, ერთ-ერთი სახალხო დამცველის გამჭვირვალედ და დემოკრატიულად არჩევას უკავშირდება.

  • მოქმედ სახალხო დამცველს, ნინო ლომჯარიას უფლებამოსილების ვადა 2022 წლის 8 დეკემბერს ეწურება;
  • უკვე დასრულდა სახალხო დამცველობის კანდიდატების გასაუბრება პარლამენტში.
  • ახალი სახალხო დამცველის ასარჩევად პარლამენტს 90 ხმა სჭირდება, ცალკეულ პარტიას დამოუკიდებლად კი ამდენი ხმა არ აქვს.

დეტალები: სახალხო დამცველობის ერთ-ერთი კანდიდატი სწორედ იაგო ხვიჩიაა.

  • დღეს, 18 ნოემბერს დეპუტატმა ხელისუფლებასა და ოპოზიციას მისი კანდიდატურის მხარდაჭერა სთხოვა.
  • მისი თქმით, ქართულ ოცნებას აქვს ძალა, თუ სრულ მობილიზებას გააკეთებს, ყველა რესურსს ჩართავს, 90 ხმა მოაგროვოს მათთვის სასურველ კანდიდატზე.
  • აცხადებს, რომ ამას დასჭირდება ოპოზიციიდან ხალხის გადაბირება — "არა კონსენსუსი, არამედ ხალხის გადაბირება".
  • "შეიძლება მე ვიყო გასაღები იმის, რომ პარლამენტმა და სახალხო დამცველმა დაპირისპირების ნაცვლად შეძლოს თანამშრომლობა", — თქვა ხვიჩიამ.

გარდა ამისა, ხვიჩიამ თქვა, რომ უნდა გაიხსნას სადისკუსიო სივრცე და დაიწყონ ლაპარაკი.

  • აცხადებს, რომ ეს მნიშვნელოვანია, რათა დასავლეთმა დაინახოს რომ პოლიტიკური სპექტრი ცივილურობის ფარგლებში იქცევა და ქვეყნის ინტერესების დაცვის ენერგია აქვს.