უკრაინის მოთხოვნას, ჩაერთონ მეზობელ ქვეყანაში მომხდარი აფეთქების გამოძიებაში და მიიღონ მტკიცებულებები, პოლონეთის პრეზიდენტი გამოეხმაურა.

რატომ არის მნიშვნელოვანი: პოლონეთის საგარეო საქმეთა სამინისტრომ გუშინ, 15 ნოემბერს განაცხადა, რომ რუსული წარმოების რაკეტა მათ ტერიტორიაზე, უკრაინის საზღვართან ჩამოვარდა, რის შედეგადაც ორი ადამიანი დაიღუპა.

  • პოლონეთის პრეზიდენტმა, ანდჟეი დუდამ დღეს, 16 ნოემბერს თქვა, რომ ჩამოვარდნილი რაკეტები, სავარაუდოდ, უკრაინის თავდაცვას უკავშირდება;
  • მისი ინფორმაციით, ეს იყო რუსული წარმოების S-300 რაკეტა, თუმცა არ აქვთ მტკიცებულება, რომ ის რუსულმა მხარემ გაისროლა.

უკრაინულმა მხარემ, ჯერ ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა, შემდეგ კი უკრაინის პრეზიდენტმა, ვოლოდიმირ ზელენსკიმ მოითხოვა მტკიცებულებები, რომლებსაც ემყარებოდა პოლონეთის წინასწარი შეფასება.

  • "მზად ვართ ჩვენს პარტნიორებს გადავცეთ რუსული კვალის შესახებ არსებული მტკიცებულებები. პარტნიორებისგან, ასევე, ველით ინფორმაციას, რის საფუძველზეც გაკეთდა საბოლოო დასკვნა, რომ ეს არის უკრაინული საჰაერო თავდაცვის რაკეტა", — განაცხადა დანილოვმა.
  • ზელენსკიმ კი თქვა, რომ დარწმუნებულია, ეს არ იყო მათი რაკეტა ან სარაკეტო შეტევა.
  • "თუ ეს ჩვენი საჰაერო თავდაცვა იყო, მაშინ ამის მტკიცებულებები მინდა", — განაცხადა უკრაინის პრეზიდენტმა.

დეტალები: პოლონეთის პრეზიდენტი ამბობს, რომ გამოძიებაში უკრაინის ჩართვას როგორც პოლონეთის, ასევე აშშ-ს ერთობლივი თანხმობა დასჭირდება.

  • "პროცესებს აწარმოებენ პოლონელი და ამერიკელი ექსპერტები და თუ ვინმეს სურს, მონაწილეობა მიიღოს ამ პროცესებში, მინიმუმ, ორივე მხარის თანხმობა დასჭირდება“, — განაცხადა ანდჟეი დუდამ პრესკონფერენციაზე.