ამის შესახებ განცხადებით უკრაინის საჰაერო ძალების სპიკერმა, იური იჰნატმა განაცხადა.

რატომ არის მნიშვნელოვანი: პოლონეთის საგარეო საქმეთა სამინისტრომ გუშინ, 15 ნოემბერს განაცხადა, რომ რუსული წარმოების რაკეტა პოლონურ სოფელ პრჟევოდოვზე, უკრაინის საზღვართან ჩამოვარდა, რის შედეგადაც ორი ადამიანი დაიღუპა.

  • პოლონეთის პრეზიდენტმა, ანდჟეი დუდამ დღეს, 16 ნოემბერს თქვა, რომ ჩამოვარდნილი რაკეტები, სავარაუდოდ, უკრაინის თავდაცვას უკავშირდება;
  • მისი განცხადებით, ეს იყო რუსული წარმოების S-300 რაკეტა, თუმცა არ აქვთ მტკიცებულება, რომ ის რუსულმა მხარემ გაისროლა.

დეტალები: როგორც სპიკერმა აღნიშნა, ყველაფერს გააკეთებენ, რათა ხელი შეუწყონ მიმდინარე გამოძიებას. მისვე თქმით, ცხადია, რომ, რაც გუშინ მოხდა, ომის შედეგია.

  • "ეს იყო რუსული რაკეტა, თუ ორივე [რუსული და უკრაინული], რაკეტების ნამსხვრევები, ადგილზე უნდა შემოწმდეს. ეს არის ის, რაც ახლა ხდება. სამართლებრივი შეფასებების გაცემა აუცილებელია".
  • დაამატა, რომ ეს პროცესი გაგრძელდება, ექსპერტები მუშაობენ და აუცილებელია დადგინდეს, რომელ რაკეტას ეკუთვნის ნამსხვრევები.
  • "არა მგონია, ეს ძალიან რთული იყოს".

იჰნატმა, ასევე, გაიხსენა ოქტომბრის ბოლოს მომხდარი ინციდენტი, როდესაც უკრაინული სამხედროების მიერ ჩამოგდებული რუსული რაკეტა მოლდოვის ერთ-ერთ სოფელში ჩამოვარდა.

  • "ეს ნამდვილად რეზონანსული სიტუაციაა, მაგრამ ეს პირველი შემთხვევა არ არის".
  • მისი განმარტებით, რაკეტა კიევმა მას შემდეგ ჩამოაგდო, რაც მან მოლდოვა-უკრაინის საზღვარი გადაკვეთა.
  • "რაკეტების ნამსხვრევები მოლდოვას ტერიტორიაზე დაეცა".

გარდა ამისა, უკრაინის ეროვნული უსაფრთხოებისა და თავდაცვის საბჭოს მდივანმა, ალექსეი დანილოვმა Twitter-ზე დაწერა, რომ ინციდენტის ერთობლივ გამოძიებას მხარს უჭერენ.

  • "მზად ვართ გადავცეთ მტკიცებულებები რუსული კვალის შესახებ, რაც გვაქვს. ველოდებით ინფორმაციას ჩვენ პარტნიორებისგან, რის საფუძველზეც გაკეთდება დასკვნა, რომ ეს უკრაინული საჰაერო თავდაცვის რაკეტაა".
  • განცხადება მას შემდეგ გაკეთდა, რაც რუსეთის საგარეო უწყებამ პასუხისმგებლობა უკრაინის საჰაერო თავდაცვის სისტემას დააკისრა და მათზე ბრალდებებს "გამიზნული პროვოკაცია" უწოდა.