უკრაინამ რუსეთს შეატყობინა, რომ უნგრეთისთვის ნავთობის მიწოდება დრუჟბას ნავთობსადენის სამხრეთი ნაწილით დროებით შეჩერებულია, ამის შესახებ როიტერსი რია ნოვოსტიზე დაყრდნობით წერს.

რატომ არის მნიშვნელოვანი: მილსადენი დრუჟბა 4000 კილომეტრი სიგრძის ქსელია, რომელიც საბჭოთა კავშირის დროსაა აგებული.

  • დღესდღეობით, დრუჟბას გავლით ნავთობი რამდენიმე ევროპულ ქვეყანას მიეწოდება.
  • მილსადენი 58 წელია ფუნქციონირებს და ამ დრომდე სარემონტო სამუშაოები არ ჩატარებია.

დეტალები: უნგრული კომპანიის, MOL-ის განცხადებით, უკრაინამ შეატყობინა, რომ უნგრეთს, სლოვაკეთსა და ჩეხეთს დრუჟბას მილსადენით ნავთობის მიწოდება დროებით შეუჩერდა.

  • უკრაინული მხარის ცნობით, ნავთობის მიწოდების შეჩერება ძაბვის ვარდნის გამო მოხდა, შედეგად კი ფენისლიტკესკენ (უნგრეთში) ნავთობის ამოტუმბვა შეაჩერეს.
  • MOL-ის რეზერვები საკმარისია უნგრეთში უწყვეტი მიწოდების უზრუნველსაყოფად, სანამ სიტუაცია არ მოგვარდება, განაცხადა კომპანიის წარმომადგენელმა.

უნგრეთის პრემიერ-მინისტრმა, ვიქტორ ორბანმა, სამშაბათს თავდაცვის საბჭოს სხდომა მოიწვია, მას შემდეგ, რაც დრუჟბას მილსადენზე ნავთობის მიწოდება შეჩერდა.

  • ორბანის პრესსამსახურის ინფორმაციით, საბჭოს სხდომამდე უნგრეთის თავდაცვის მინისტრმა სატელეფონო კონსულტაცია გამართა ნატოს გენერალურ მდივანთან იენს სტოლტენბერგთან.