დიდი ოცეულის სამიტზე გამოსვლისას, ინდოეთის პრემიერმინისტრმა, ნარენდრა მოდიმ რუსეთ-უკრაინის ომის დასასრულებლად მოლაპარაკებების დაწყებასა და მშვიდობის დამყარებაზე ისაუბრა.

რატომ არის მნიშვნელოვანი: ექსპერტთა მოსაზრებით, ინდოეთმა შესაძლოა რუსეთ-უკრაინის ომის დასრულებაში მნიშვნელოვანი როლი შეასრულოს.

  • როგორც დასავლეთთან, ასევე რუსეთთან კარგი ურთიერთობის გამო, ინდოეთს სულ უფრო ხშირად ასახელებენ, როგორც მშვიდობის შესაძლო მომლაპარაკებელს, თუ რუსეთ-უკრაინის მოლაპარაკებები შედგება.
  • მოდის განცხადებით, გაერომ ვერ შეძლო გამკლავებოდა ყველაზე მნიშვნელოვან გამოწვევებს, და შესაბამისად, დიდი ოცეული სამიტი უფრო მნიშვნელოვანი და აქტუალური გახდა.
  • ინდოეთი მომავალ წელს დიდი ოცეულის სამიტს უმასპინძლებს.

დეტალები: "მე არაერთხელ მითქვამს, რომ ჩვენ უნდა ვიპოვოთ გზა უკრაინაში ცეცხლის შეწყვეტისა და დიპლომატიის გზაზე დასაბრუნებლად", — თქვა მოდიმ.

  • პრემიერმინისტრის განცხადებით, საჭირო მიიღონ კონკრეტული და კოლექტიური გადაწყვეტილება "მსოფლიოში მშვიდობის, ჰარმონიისა და უსაფრთხოების უზრუნველსაყოფად".
  • "გასული საუკუნის განმავლობაში, მეორე მსოფლიო ომმა მსოფლიოში ნგრევა გამოიწვია. შედეგად, იმდროინდელი ლიდერები სრული ძალისხმევით ცდილობდნენ მშვიდობის გზას დასდგომოდნენ. ახლა ჩვენი ჯერია", — დასძინა მან.

ამასთანავე, ინდოეთმა თავი შეიკავა გაეროს ყველა კენჭისყრისგან, რომელიც გმობდა რუსეთის შემჭრას უკრაინაში.

  • ინდოეთმა არ დაგმო რუსეთის უკრაინაში შეჭრა, თუმცა სექტემბერში გამართულ შეხვედრაზე, ინდოეთის პრემიერმინისტრმა პუტინს უთხრა, რომ "ახლა ომის დრო არ არის".
  • არსებობს ვარაუდი, რომ ინდოეთმა ითამაშა გარკვეული როლი რუსეთის დარწმუნებაში, რომ უკრაინული ხორბლის გემებს პორტები დაეტოვებინათ გლობალური საკვების დეფიციტის შესამსუბუქებლად.