გენიჩესკს რუსეთის მიერ მინიჭებული ტიტული მხოლოდ რამდენიმე საათი ხვდა წილად. საოკუპაციო ადმინისტრაციის განცხადებით, არ ეთანხმებიან განცხადებას, ხერსონის ოლქის დედაქალაქის გენიჩესკში გადატანის შესახებ.

რატომ არის მნიშვნელოვანი: გუშინ, კრემლის პროპაგანდისტულმა მედიამ რუს ოფიციალურ პირებზე დაყრდნობით გაავრცელა ცნობა, რომ გენიჩესკი ხერსონის ოლქის დროებით "დედაქალაქად" აირჩიეს.

  • ხერსონში რუსების სტრატეგიული მარცხის შემდეგ ამ ინფორმაციას ინტერნეტში არაერთგვაროვანი რეაქციები მოჰყვა.
  • გენიჩესკი აზოვის ზღვის პირას მდებარე საპორტო ქალაქია, სადაც გაქცეული რუსები და კონფორმისტები შეიკრიბნენ.

ფოტო: Ukrainska Pravda

დეტალები: საოკუპაციო ადმინისტრაციამ განმარტა, რომ ალექსანდრ ფომინი არ იყო უფლებამოსილი პირი მსგავსი გადაწყვეტილების მისაღებად.

  • უწყების ცნობით, ფომინი, "ხერსონის ოლქის ადმინისტრაციის ყოფილი თანამშრომელია".
  • "გენიჩესკი გახდა ქალაქი, სადაც დროებით იქნა გადატანილი ოლქის მთავრობის მრავალი განყოფილება და ინსტიტუტი", — განმარტავს საოკუპაციო უწყება.

პარალელურად: 11 ნოემბერს უკრაინის მთავარმა სადაზვერვო სამსახურმა გაავრცელა განცხადება, რომ ხერსონი უკრაინის კონტროლის ქვეშ დაბრუნდა.

  • ხერსონში უკრაინის სამხედრო ადმინისტრაციამ, უსაფრთხოების სამსახურმა და პოლიციამ მუშაობა განაახლა.