ინფორმაციას ადგილობრივი მედია გენერალურ პროკურატურაზე დაყრდნობით ავრცელებს.

რატომ არის მნიშვნელოვანი: ეს პირველი შემთხვევა არ არის, როცა უკრაინულმა მხარემ დეოკუპირებულ ტერიტორიებზე ცხედრები აღმოაჩინა.

  • ოფიციალური პირების ამბობენ, რომ ძირითადად სამარხებში მშვიდობიანი მოქალაქეები არიან, მათ შორის ბავშვები და მათ წამების კვალი აღენიშნებათ.
  • რუსეთი უარყოფს საკუთარ დანაშაულს და მასობრივ საფლავებზე ინფორმაციას სიცრუეს უწოდებს.

დეტალები: უკრაინამ ხერსონის ოლქზე კონტროლი ახლახან დაიბრუნა — სამხედროები გათავისუფლებულ დასახლებებში ეტაპობრივად შედიან.

  • ერთ-ერთ სოფელში 3 ცხედარი იპოვეს, რომლებსაც პირველადი დათვალიერებით თავის ქალა აქვთ დაზიანებული.
  • დაწყებულია გამოძიება ომის კანონების დარღვევის და განზრახ მკვლელობის მუხლებით, ცხედრები კი ექსპერტიზაზე გაგზავნეს.

იზიუმი: ირპენის, ბუჩასა და სხვა ქალაქების შემდეგ, მასობრივი საფლავი იპოვეს ახალგათავისუფლებულ იზიუმშიც — მასში 447 ცხედარი იყო.

  • ზელენსკის თქმით, იზიუმი პატარა ქალაქია და ძალიან დიდი დანაკარგი განიცადა.
  • მისივე თქმით, პირველ მასობრივ საფლავში მთელი ოჯახი იყო დაკრძალული, რომლებიც აწამეს და მოკლეს: "მოზარდები, კაცები და ქალები და პატარა ბავშვები თავებში ტყვიებით. მათი სხეულის ზოგიერთი ნაწილი დაკარგული იყო".

ხარკოვი: 6 ოქტომბერს კი მასობრივი საფლავი იპოვეს ხარკოვში — მასში 534 ადამიანის ცხედარი იყო, მათ შორის, 19 ბავშვის.

  • რეგიონის დეოკუპირებულ ტერიტორიაზე აღმოჩენილია წამების 22 საკანიც.

საერთაშორისო გამოხმაურებები: აშშ-ის უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ იზიუმში აღმოჩენილ სამარხს შემზარავი უწოდა.

  • ესტონეთის პრემიერმინისტრი ამბობდა, რომ იზიუმი არის რუსული ოკუპაციის სახე: "ქალაქები გადაიქცა მასობრივ სასაფლაოდ".
  • საფრანგეთის პრეზიდენტმა, ემანუელ მაკრონმა აღნიშნა, რომ დამნაშავეები პასუხს აგებენ თავიანთ ქმედებებზე.
  • საგარეო პოლიტიკისა და უსაფრთხოების საკითხებში ევროკავშირის უმაღლესმა კომისარმა, ჯოზეფ ბორელმა განაცხადა, რომ რუსეთის აგრესიული ომი უკრაინის წინააღმდეგ სისხლისა და ნგრევის კვალს ტოვებს.