ინფორმაციას ამის შესახებ საქართველოს ახალგაზრდა იურისტთა ასოციაცია აქვეყნებს.

რატომ არის მნიშვნელოვანი: საქმე 2019 წელს დიდ დიღომში მომხდარ აფეთქებას ეხება, რომლის შედეგადაც ოთხი ადამიანი, მათ შორის, ქალი და მისი 4 წლის შვილი დაიღუპა.

  • დედისა და ძმის დაღუპვის შემდეგ კომპანიის წინააღმდეგ სარჩელი ორმა არასრულწლოვანმა შეიტანა.
  • ორგანიზაციის ცნობით, კომპანიის თანამშრომლებმა, ოსტატმა და ზეინკალმა არ შეასრულეს კანონმდებლობითა და სამსახურებრივი ინსტრუქციით დაკისრებული ვალდებულება.
  • კერძოდ, სრულად უნდა შეემოწმებინათ მთლიანი სადარბაზო, თითოეულ სართულზე ბინები, ლიფტის შახტა და სათავსო.
  • ასევე, არ მიუღიათ პრევენციული ზომა შესაძლო ავარიის თავიდან ასაცილებლად და ადგილის დატოვებიდან დაახლოებით ორ საათში გაჟონილი და დაგროვილი ბუნებრივი აირი აფეთქდა.

დეტალები: საიას ცნობით, თბილისის ენერჯის თანამშრომლებს სისხლისსამართლებრივი პასუხისმგებლობა დაეკისრათ 2201 მუხლის მე-2 ნაწილით გათვალისწინებული დანაშაულის გამო 4-4 წლით თავისუფლების აღკვეთა მიესაჯათ.

  • ეს მუხლი გულგრილობას გულისხმობს და გამოიხატება სპეციალური უფლებამოსილების მქონე პირების სამსახურებრივი მოვალეობის შეუსრულებლობაში.

ექსპერტიზის დასკვნით დასტურდება, რომ აფეთქების სამი კერა არსებობდა — კორპუსის ერთი კონკრეტული ბინა, ლიფტის შახტა და სადარბაზო.

  • ორგანიზაციის განცხადებით, კომპანია აპელირებდა იმაზე, რომ აფეთქება ბინაში ბუნებრივი აირის გაჟონვამ განაპირობა, რაზეც, მოპასუხის მითითებით, პასუხისმგებლობა ბინის მესაკუთრეს ეკისრებოდა.
  • "მოპასუხე უარყოფდა თანამშრომლების გულგრილობის ფაქტს, რომლებსაც ვალდებულება ჯეროვნად რომ შეესრულებინათ, ისინი აღმოაჩენდნენ გაჟონვის კერებს და მოსახლეობას შეეზღუდებოდა ბუნებრივი აირის მიწოდება, რითაც თავიდან იქნებოდა აცილებული მომხდარი ტრაგედია".
  • როგორც საიაში აღნიშნავენ, ექსპერტიზის დასკვნა ადასტურებს, რომ აფეთქების ამ მასშტაბს მხოლოდ ერთ კონკრეტულ ბინაში მომხდარი აფეთქება ვერ გამოიწვევდა.

სასამართლომ მოსარჩელის სამართლებრივი პოზიცია თბილისი ენერჯის, როგორც დამსაქმებლისა და ლიცენზიატი კომპანიის პასუხისმგებლობაზე სრულად გაიზიარა.

  • შედეგად, კომპანიას არასრულწლოვანი მოსარჩელეების სასარგებლოდ დაეკისრა სარჩოს გადახდა დედის გარდაცვალებიდან სრულწლოვანების ასაკს მიღწევმდე;
  • ჯანმრთელობისთვის მიყენებული ზიანის ანაზღაურება 5 ათასი და 2 ათასი ლარით.
  • დედისა და ძმის გარდაცვალებით მიყენებული მორალური ზიანის ანაზღაურება, თითოეული მოსარჩელისთვის 50-50 ათასი ლარის ოდენობით.