ელექტრონული მუსიკისა და ვიზუალური ხელოვნების ფესტივალი DECODER 2 სექტემბერს, 23:59 საათზე, Spacehall Kustba-ს ღია სივრცეში მასშტაბური საფესტივალო ღამით დაბრუნდება, რომლის ფარგლებშიც თბილისს თანამედროვე ელექტრონული მუსიკის ერთ-ერთი ყველაზე წარმატებული არტისტი SOLOMUN ეწვევა და ადგილობრივი სცენის შთამბეჭდავ წარმომადგენლებთან ერთად შემოდგომის სერიებს გახსნის.

SOLOMUN თანამედროვე ელექტრონული მუსიკის სცენის ერთ-ერთი ყველაზე სახელგანთქმული არტისტია, რომლის აქტიური მუსიკალური შემოქმედება ორ დეკადას ითვლის. ამ პერიოდის განმავლობაში მელოდიური ტონალობებისა და საცეკვაო რითმების სინთეზით შექმნილი მისი კომპოზიციები გლობალური მასშტაბით ყველაზე დიდი და ხალხმრავალი ფესტივალების ჰიტად იქცა.

2005 წელს მეგობრებთან ერთად დაფუძნებული ლეიბლის DIYNAMIC ფარგლებში გამოშვებული ალბომები მალევე მოექცა საერთაშორისო მედიის ყურადღების ცენტრში, ხოლო მზარდი პოპულარობისა და დასამახსოვრებელი, მიმზიდველი, მსმენელისთვის ადვილად აღსაქმელი მუსიკის დამსახურებით ის ჰედონისტების ერთ-ერთი საყვარელი კუნძულის, იბიცას კლუბების რეზიდენტია.

SOLOMUN-ის თავდაუზოგავმა სიყვარულმა Do it Yourself ესთეტიკის მიმართ მის საქმიანობას მრავალი შრეები შესძინა. ამჟამად იგი ორი ლეიბლის, DIYNAMIC და 2DIY4 მესვეურობას ითავსებს და ბერლინური კლუბის, EGO დამფუძნებელი და DIYNAMIC-ის რადიო შოუების ავტორია.

სხვადასხვა წლებში SOLOMUN-ს მოპოვებული აქვს გამარჯვებულის ტიტული წლის საუკეთესო დიჯეის, საუკეთესო ალბომის, საუკეთესო ლეიბლისა და საუკეთესო პროდიუსერის ნომინაციებში. საფესტივალო ღამეზე მასთან ერთად დაუკრავს ადგილობრივი სცენის ერთ-ერთი ყველაზე წარმატებული დიჯეი და პროდიუსერი, თადე თოდუა პროექტით TADE, რომლის პირველი აღიარება კანადურ ლეიბლზე DASH DEEP RECORDS და მოგვიანებით, UNDERYOURSKIN RECORDS-ზე გამოცემულ ჩანაწერებს მოჰყვა. კრიტიკოსებისა და ელექტრონული მუსიკის ენთუზიასტებისგან მიღებული მაღალი შეფასებების შემდეგ TADE ადგილობრივი კლუბებისა და ფესტივალების ხშირ სტუმრად და DECODER-ის ხანგრძლივ მეგობრად იქცა. სტილისტური მრავალფეროვნების წყალობით ის ყოველთვის საუკეთესოდ ახერხებს საკლუბო და საფესტივალო ღამე მრავალი და სხვადასხვა მიმართულების მქონე არტისტებთან ერთად ნამდვილ დღესასწაულად აქციოს.

ფესტივალი DECODER 2017 წელს დაფუძნდა და მის ფარგლებში თბილისს ელექტრონული მუსიკის ისეთი დიდი სახელები სტუმრობდნენ, როგორიცაა Richie Hawtin, Amelie Lens, Nicolas Jaar, Peggy Gou, Ellen Allien, Black Coffee, Mano Le Tough და სხვა.