ამის შესახებ სპეციალური საგამოძიებო სამსახურის ხელმძღვანელმა, კონსტანტინე კაციტაძემ განაცხადა. მისივე თქმით, გამოძიების დაწყებას საფუძვლად შეტყობინება დაედო, სადაც ოჯახი მიუთითებდა, რომ გოგაშვილის მიმართ ძალადობრივი ქმედება განხორციელდა.

რატომ არის მნიშვნელოვანი: ის 16 ივლისს დააკავეს. გოგაშვილს ბრალდება სამი მუხლით აქვს წაყენებული.

  • გოგაშვილმა სხდომაზე მისი დაკავების პროცესი აღწერა და სამართალდამცავები ძალადობრივ, არაადამიანურ, არასათანადო მოპყრობასა და იარაღის "ჩადებაში" დაანაშაულა.
  • დღეს, 18 ივლისს გოგაშვილს აღკვეთის ღონისძიების სახით პატიმრობა შეეფარდა.

დეტალები: კაციტაძის ცნობით, გამოძიება სისხლის სამასრთლის კოდექსის 333-ე მუხლის მესამე ნაწილის "ბ" ქვეპუნქტით მიმდინარეობს.

  • მისივე თქმით, დაინიშნება სასამართლო სამედიცინო ექსპერტიზა და იმსჯელებენ შესაძლო დაზიანებებზე.

არქივიდან: დაკავებამდე რამდენიმე საათით ადრე გოგაშვილმა პოსტი გამოაქვეყნა, სადაც თვითმმართველობის არჩევნების დროს გაყალბების მტკიცებულებებზე ისაუბრა.

  • წერდა, რომ არჩევნების გაყალბების მთლიანი სტრუქტურის შესახებ ინფორმაცია ყველა შესაბამის ორგანიზაციას, მათ შორის, დიპლომატიურ კორპუსსა და მედიას გადასცა.
  • მიუთითებდა, რომ 2021 წლის შემოდგომაზე მედიასაშუალებებმა არჩევნების გაყალბების ფაქტები ნაწილობრივ გააშუქეს.
  • მისი თქმით, 13 ივლისს, გია გაჩეჩილაძის მიერ გავრცელებული ჟურნალისტებზე სავარაუდო უკანონო მიყურადების შედეგად მოპოვებული ჩანაწერის ნაწილი ერთ-ერთი სიუჟეტის მომზადების პროცესს ასახავდა.
  • გაჩეჩილაძის გავრცელებულ ჩანაწერებზე სპეციალურმა საგამოძიებო სამსახურმა 14 ივლისს გამოძიება დაიწყო.