ევროკავშირის ელჩი საქართველოში, კარლ ჰარცელი ევროკავშირის გაფართოების პროცესთან დაკავშირებით მოქალაქეების კითხვებს ვიდეომიმართვით პასუხობს.

რატომ არის მნიშვნელოვანი: ევროკომისიამ ევროკავშირის წევრობის კანდიდატის სტატუსი ასოცირებული ტრიოს ორ ქვეყანას მიანიჭა, საქართველოს კი 12 პირობა და ამ პირობების შესასრულებლად 6-თვიანი ვადა მისცა.

პირველი რეკომენდაცია: ჰარცელის თქმით, პასუხისმგებლიან და ქმედით მოქალაქედ ყოფნისთვის, საჭიროა კარგად ინფორმირებულობა.

  • "გირჩევთ, დარჩეთ პროცესში ჩართული და მოიძიოთ ობიექტური ინფორმაცია".
  • "დეზინფორმაცია ისედაც ბევრია, მაგრამ კარგად ინფორმირებული საზოგადოება ვერ მოტყუვდება".

მეორე რეკომენდაცია: ელჩი საუბრობს მშვიდობიანი დემონსტრაციების მნიშვენლობაზე.

  • "მშვიდობიანი დემონსტრაციები, რომლებიც ჩვენ თბილისში და სხვაგან ვიხილეთ, სადაც რიგითი მოქალაქეები გამოხატავენ თავიანთ მოლოდინებს ხელისუფლებისა და პოლიტიკური ელიტის მიმართ, არის კიდევ ერთი დემოკრატიული ინსტრუმენტი — ყველასთვის შეხსენება, თუ რას მოელით თქვენი პოლიტიკოსებისგან".

მესამე რეკომენდაცია: ჰარცელი არჩევნების გზით ცვლილებების შესაძლებლობაზე საუბრობს.

  • "ყოველ 4 წელიწადში ერთხელ თქვენ გაქვთ შესაძლებლობა, ხმა მისცეთ არჩევნებში იმ პარტიებს, რომლებიც, თქვენი აზრით, უკეთ ამართლებენ თქვენს მოლოდინს და უარი თქვათ მათზე, ვინც მოლოდინს გაგიცრუებთ".