საქართველოს ბანკი დეველოპერული სექტორის ხელშეწყობის მიზნით პროექტების მხარდაჭერას განაგრძობს. ბანკისა და გუმბათი ჯგუფის ერთობლივი პროექტის ფარგლებში, კვარიათში, ზღვის პირველ ზოლში აპარტოტელი გუმბათი რეზიდენსი შენდება. პროექტის ჯამური ინვესტიცია 5.3 მლნ აშშ დოლარს შეადგენს, საქართველოს ბანკის ფინანსური მხარდაჭერა კი 3.7 მლნ აშშ დოლარს აღწევს.

პროექტი სხვადასხვა ზომის 103 აპარტამენტს, ლაუნჯსა და რესტორანს, ფრენბურთის მოედანს, ღია კინოთეატრს, ფიტნესს, ბუნგალოსა და გარე აუზს მოიცავს. ასევე, 2000 მ2-ზე გამწვანებულ ეზოსა და კეთილმოწყობილ სანაპიროს.

„ის რაც პროექტს გამოარჩევს, არის მშენებლობის მაღალი სტანდარტი, იდეალური ადგილმდებარეობა, ადმინისტრაციის მომსახურება, კერძო, ორსართულიანი მიწისქვეშა ავტოსადგომი, გასართობი და სარელაქსაციო ზონები, მთისა და ზღვის პანორამული ხედები, ვინტილირებადი ფასადი და ა.შ. ეს გუმბათი ჯგუფის რიგით მეათე პროექტია და მოხარული ვართ, რომ გუმბათი რეზიდენსის პროექტს საქართველოს ბანკთან ერთად ვახორციელებთ", — განაცხადა კომპანიის დირექტორმა და თანადამფუძნებელმა, ლაშა ბალაძემ.

"კომპანია გუმბათი ჯგუფი ბაზარზე 1998 წლიდან ოპერირებს და, მშენებლობის მაღალი სტანდარტების დამსახურებით, თავის სფეროში დღემდე მოწინავე ადგილს იკავებს . ეს არის პირველი კომპანია, რომელმაც ბათუმში დიდი მასშტაბის მშენებლობა დაიწყო. ოცდაორწლიანი გამოცდილება, აშენებული 500.000 მ2 კომერციული და საცხოვრებელი ფართი, ასევე, ორი ოლიმპიური სტანდარტის სტადიონი ძალიან ბევრს მეტყველებს ამ კომპანიაზე და მოხარული ვართ, რომ, ჩვენი ერთობლივი პარტნიორობის ფარგლებში, კვარიათს გუმბათი რეზიდენსის სახით ასეთი აპარტოტელი შეემატება. გვინდა, კომპანიას კიდევ უფრო მეტი წარმატება და საინტერესო პროექტების განხორციელება ვუსურვოთ", — აცხადებს საქართველოს ბანკის კორპორაციული გაყიდვების სექტორის ხელმძღვანელი, ნათია ღლონტი.