საბა კბილაშვილმა პარტიის დატოვების შესახებ განცხადება ქართული ოცნების ლიდერების ქებით დაიწყო და თქვა, რომ იცის, "რა დღეში არიან" ისინი, "როგორ იბრძვიან ქვეყნისთვის" და "რა სირთულეებს აქვთ იმის მიღმა, რაც ტელევიზორში ჩანს".

რატომ არის მნიშვნელოვანი: ბოლო პერიოდში, აშშ-ის ელჩი როგორც მმართველი პარტიიდან წასულების, ასევე, მოქმედი დეპუტატების კრიტიკის ობიექტი გახდა.

  • 8 ივლისს ყაველაშვილმა დეგნანს წერილი მისწერა და ჰკითხა, რატომ არ ემიჯნება "პროვოკაციებს".
  • პასუხად, დეგნანმა წერილს ტყუილებითა და კონსპირაციული თეორიებით სავსე უწოდა და აღნიშნა, რომ ბოლომდე ვერ წაიკითხა.
  • დღეს თანამდებობები, ლაგოდეხის, თერჯოლის და ჭიათურის საკრებულოების წევრებმა დატოვეს.

რას წერს კბილაშვილი: ის განცხადებაში ანტიდასავლურ ნარატივებს აჟღერებს და "ოცნებიდან" წასულების მესიჯბოქსებს იმეორებს.

  • მისი თქმით, ასეთი დამოუკიდებელი საქართველო არასდროს ყოფილა და არ სურს ქვეყანა "ამისთვის დაისაჯოს".
  • "ქართველებმა ზუსტად ვიცით ვინ არის მტერი, ოკუპანტი და ვინ მოყვარე, მაგრამ მოყვრობაში თავმოყვარეობაზე უარის თქმა და სულში ხელების ფათური არავინ უნდა მოგვთხოვოს".
  • "ამიტომ ვუერთდები ჩემი პატივცემული კოლეგის მოწოდებას და ვტოვებ თანამდებობასაც და პარტიასაც".

გარდა ამისა, კბილაშვილი წერს, რომ ქართული ოცნებიდან წასულმა დეპუტატებმა საკუთარ თავზე აიღეს "რთულად სათქმელი სიმართლე".

  • "ღმერთმა არ ქნას, რომ მათ რაც იციან, ყველაფრის თქმა დაჭირდეთ. თუ მაინც საჭირო გახდა, მეც მათ გვერდით ვიქნები!"