მედიის ადვოკატირების კოალიციამ და ჟურნალისტებმა გასული წლის 5 ივლისის მოვლენებიდან ერთი წლის თავზე პროკურატურასთან აქცია-პერფორმანსი გამართეს. კოალიციამ მედიაგარემო შეაფასა და ხელისუფლებას კონკრეტული ნაბიჯების გადადგმისკენ მოუწოდა.

რატომ არის მნიშვნელოვანი: ზუსტად ერთი წლის წინ, 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა — აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალიტს.

• ამ დროისთვის, დაზარალებულად ცნობილია 53 პირი, სისხლისსამართლებრივი დევნა კი 27 პირის მიმართ დაიწყო.
• ნაცემი ოპერატორი, ლექსო ლაშქარავა 11 ივლისს გარდაიცვალა.
  მძიმე დანაშაულის ჩადენიდან ერთი წლის თავზე, დანაშაულის ორგანიზატორები არ დასჯილან და ახალ კანონსაწინააღმდეგო ქმედებებში მონაწილეობენ.
• იმ პირებს, რომლებსაც ბრალი ჰქონდათ წაყენებული, მინიმალური სანქციები შეეფარდათ.

კოალიციის განცხადებით, დაუსჯელობის სინდრომმა კიდევ უფრო გააუარესა მედიაგარემო საქართველოში.

• ისინი აღნიშნავენ, რომ დღეს მედიის წარმომადგენლები ხელისუფლების მიმართ კრიტიკული სარედაქციო პოლიტიკის გამო სამიზნეები ხდებიან და სიცოცხლისა და ჯანმრთელობისთვის საშიშ გარემოში უწევთ მუშაობა.
• "მუქარა, შევიწროება, უკანონო მოსმენა-მიყურადება და თვალთვალი, ზეწოლა, დისკრიმინაცია, დისკრედიტაცია, ფიზიკური თავდასხმა, ბრიფინგებზე ჟურნალისტების შერჩევით დაშვება — ეს დარღვევების მცირე ჩამონათვალია".
• "თითქმის ყოველდღე ხდებიან პოლიტიკოსების თუ წახალისებული მოძალადეების სიტყვიერი ან/და ფიზიკური თავდასხმის მსხვერპლები. საფრთხის ქვეშ ცხოვრობენ მათი ოჯახის წევრებიც".

გარდა ამისა, მიუთითებენ, რომ ჟურნალისტებს საჯარო ინფორმაციაზე წვდომა განსაკუთრებით მაშინ ეზღუდებათ, როცა ხელისუფლების მიერ ძალაუფლების ბოროტად გამოყენების, ადამიანის უფლებების დარღვევის, კორუფციისა თუ სხვა დანაშაულებრივი საქმიანობის შემთხვევებს იკვლევენ.

• "პატიმრობაშია კრიტიკული ტელევიზიის, მთავარი არხის დირექტორი ნიკა გვარამია, რომლის გამამტყუნებელ განაჩენსაც შიდა და საერთაშორისო ორგანიზაციები პოლიტიკურად მოტივირებულად მიიჩნევენ".

კოალიცია ხელისუფლებას მოუწოდებს, გამოავლინოს და სათანადოდ დაისაჯოს 5-6 ივლისს დანაშაულებრივი ქმედებების უშუალო ჩამდენები და ორგანიზატორები და შეახსენებს, რომ ამაზე პასუხისმგებლობა მათ ეკისრებათ.

• ასევე, მოუწოდებს, სწრაფად და ეფექტიანად გამოიძიოს ჟურნალისტების წინააღმდეგ მომრავლებული თავდასხმები, მათ პროფესიულ საქმიანობაში უკანონო ხელისშეშლის ფაქტები და პასუხისგებასი მისცეს შესაბამისი პირები.
• შეწყდეს კრიტიკული მედიასაშუალებების მიმართ მიმდინარე პოლიტიკურად მოტივირებული გამოძიებები და სასამართლო პროცესები.
• გათავისუფლდეს ნიკა გვარამია.
• გამოიძიონ მედიის წარმომადგენლების მასობრივი უკანონო ფარული მოსმენა-მიყურადების და თვალთავლის საქმეები.