ინფორმაცია საქართველოს დემოკრატიულმა ინიციატივამ (GDI) გაავრცელა, რომელიც Tbilisi Pride-ისა და ლგბტქ+ აქტივისტების უფლებებს ევროსასამართლოში იცავს. მათი ცნობით, ადამიანის უფლებათა ევროპულმა სასამართლომ აღნიშნა, რომ საქმეს, შესაძლოა, პრეცედენტული მნიშვნელობა მიენიჭოს.

რატომ არის მნიშვნელოვანი: ზუსტად ერთი წლის წინ, 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა — აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალიტს.

  • ნაცემი ოპერატორი, ლექსო ლაშქარავა 11 ივლისს გარდაიცვალა.
  • ამ დრომდე არ დასჯილან ჰომოფობიური ჯგუფის ლიდერები, რომლებიც ღიად აანონსებდნენ ძალადობას Tbilisi Pride-ის აქტივისტებისა და რუსთაველზე შეკრებილების წინააღმდეგ.
  • იმ პირებს, რომლებსაც ბრალი ჰქონდათ წაყენებული, მინიმალური სანქციები შეეფარდათ.

GDI-ის ცნობით, მოსაჩივრეები საჩივრით ხელისუფლების უმოქმედობისა და არაეფექტური რეაგირების გამო კონვენციით გარანტირებული უფლებების მუხლების დარღვევის დადგენას ითხოვენ.

  • კერძოდ, საუბარია კონვენციის მე-3 (წამების, არაადამიანური და დამამცირებელი მოპყრობის აკრძალვა), მე-11 (შეკრების თავისუფლება), მე-13 (სამართლებრივი დაცვის ქმედითი საშუალების უფლება) და მე-14 (დისკრიმინაციის აკრძალვა) მუხლებზე.

დეტალები: ორგანიზაციაში ამბობენ, რომ სასამართლომ საქმე ყველა მუხლთან მიმართებით დაკომუნიცირა, რაც იმას ნიშნავს, რომ მთავრობა ვალდებულია 13 ოქტომბრამდე საჩივრის ყველა საკითხზე სასამართლოს კითხვებს პასუხი გასცეს.

  • "სასამართლოს აინტერესებს, ხომ არ წაახალისა ხელისუფლების წევრების განცხადებებმა ის ძალადობა, რომელმაც იფეთქა 5 ივლისს და რამდენად შეასრულა მასზე ნაკისრი პრევენციისა და ეფექტიანი გამოძიების ვალდებულებები".
  • "სასამართლომ დააკმაყოფილა GDI-ს შუამდგომლობა და მთავრობას დაავალა, 5 ივლისის უსაფრთხოების გეგმისა და შიდა მასალების წარმოდგენა, რომელიც ეხება შსს-ს მიერ განხორციელებული უსაფრთხოების ღონისძიებების დაგეგმვას სადავო მოვლენების (2021 წლის 1-ლი და 5 ივლისის) წინ.

არქივიდან: გასული წლის 5 ივლისის დილას პრემიერმინისტრმა, ირაკლი ღარიბაშვილმა Tbilisi Pride-ის ბრალეულობაზე ისაუბრა და მაშინ, როდესაც ძალადობრივი ჯგუფები იყვნენ გამოსული, აქტივისტებს პროვოკაცია დააბრალა.

  • არასამთავრობო სექტორმა ღარიბაშვილის განცხადება ძალადობის წახალისებად შეაფასა.