დიმიტრი სამხარაძე გინების გამო თავს დამნაშავედ არ გრძნობს — ამაზე Facebook-ზე მისი ბოლო რამდენიმე პოსტიც მეტყველებს, რომელიც გუშინდელი საქციელის შემდეგ "თავის გასამართლებლად" გამოაქვეყნა.

რატომ არის მნიშვნელოვანი: ბოდიშის მოხდის ნაცვლად, დეპუტატი სოციალურ ქსელში გააქტიურდა და აგრესიული რიტორიკა სწორედ იქ გააგრძელა.

დეტალები: ქართული ოცნების დეპუტატმა რამდენიმე ვიდეო გაავრცელა, მათ შორის, მთავარი არხის დამფუძნებლის, ნიკა გვარამიასა და ნაციონალური მოძრაობის წევრის, ლევან ხაბეიშვილის.

  • ნაწყვეტებში ჩანს, რომ ხაბეიშვილი კრიტიკულად, გვარამია კი შეურაცხმყოფელი ლექსიკით იხსენიებს ბიძინა ივანიშვილს;

  • "აი, ამისთვის" — წერს ვიდეოებზე დეპუტატი და მიანიშნებს, რომ ასეულობით მოქალაქეს შეურაცხყოფა ამ ფრაზების გამო მიაყენა;

  • მეტიც, იქვე ახალ გინებას აანონსებს იმუქრება, რომ "კიდევ ბევრჯერ მოუწევთ" მისგან;

  • "ნაცების შნირ ტელევიზიას, ამისთვის" — წერს სამხარაძე, მთავარი არხის ნიუსის ერთ-ერთ სქრინშოტზე, რითიც ხაზს უსვამს, რომ მისი გინება ტელევიზიასაც მიემართებოდა იმის გამო, რომ ბერა ივანიშვილის წინააღმდეგ დაგეგმილი გინების აქცია გაანიუსა.

რა მოხდა: 3 ივლისს სამხარაძე ოფისიდან გამოვიდა და რამდენჯერმე შეიგინა. ამ დროს ქართული ოცნების ოფისი პოლიციის და სპეცდანიშნულების რაზმებით იყო გარშემორტყმული.

  • გინების შემდეგ ის რამდენიმე პირმა უკან შეაბრუნა.
  • მანამდე დეპუტატმა ფეისბუქზე დაპოსტა: "10 კაცი ვართ ოფისში! გელოდებით დორბლიან მონებს".
  • მოგვიანებით კი თავადვე გაავრცელა და წაშალა ვიდეო, სადაც ჩანდა, რომ აქციის მონაწილეებს აივნიდან აგინა.