უკრაინის პრეზიდენტის, ვოლოდიმირ ზელენსკის განცხადებით, ოკუპანტებმა 200 000-ზე მეტი ბავშვი იძულებით გაიყვანეს ქვეყნიდან. მისი თქმით, ამის მიზანი არა მხოლოდ ადამიანთა გატაცებაა, არამედ რუსეთს სურს, დაავიწყოს მათ უკრაინა და ვეღარ დაბრუნდნენ ქვეყანაში.

ომის 98 დღეს, პირველი ივნისს მან ბავშვებზე ისაუბრა. მისი განცხადებით, ომის დაწყებიდან დღემდე დაშავდა 446, დაიღუპა 243, ხოლო 149 ამ დრომდე დაკარგულია.

"ადამიანის ცნობიერება არ აღიქვამს დიდ რიცხვებს. რაც უფრო დიდია რიცხვი, მით უფრო უჭირს ადამიანს იმის გაცნობიერება, თუ რა დგას მის უკან. დანგრეული ოჯახები, ბავშვები, რომლებსაც დროც კი არ ჰქონდათ ენახათ როგორია ცხოვრება", — ამბობს ზელენსკი.

უკრაინის პრეზიდენტის თქმით, ბავშვთა დაცვის საერთაშორისო დღე განსაკუთრებული რიცხვი იყო ყოველთვის, როდესაც დიდები განსაკუთრებულ ყურადღებას აქცევენ ბავშვების უფლებებს, უსაფრთხოებას და განვითარებას. თუმცა მან აღნიშნა, რომ 24 თებერვლიდან უკრაინისთვის ყველა დღე "დაცვისაა".

"დავიცვათ მთელი ჩვენი ხალხი, ბავშვები, ჩვენი მომავალი. თავისუფალი ქვეყანა, სადაც ყველა ბავშვს შეუძლია, როცა გაიზრდება, იცხოვროს ისე, როგორც მას სურს. იძულებისა და ჩაგვრის გარეშე", — თქვა მან.

ზელენსკიმ რუსეთის თავდასხმების გამო დაღუპულ ბავშვებზე ისაუბრა და რამდენიმე მათგანის ისტორია მოყვა.