შვედეთის პრემიერმინისტრი მაგდალენა ანდერსონი აცხადებს, რომ ანკარის წინააღმდეგობასთან დაკავშირებით NATO-ში გაწევრიანების შესახებ, თურქეთთან დიალოგს გააგრძელებენ.

"მოუთმენლად ველით კონსტრუქციულ შეხვედრას თურქეთთან უახლოეს მომავალში" — განაცხადა მან.

მისივე თქმით, ნებისმიერი საკითხი და გაუგებრობა, რასაც შეიძლება ჰქონდეს ადგილი, მოგვარდება.

18 მაისს ფინეთმა და შვედეთმა NATO-ში გაწევრიანების განაცხადი ოფიციალურად წარადგინეს. ალიანსის გენერალური მდივნის, იენს სტოლტენბერგის განცხადებით, ეს არის ისტორიული მომენტი, რომელიც უნდა გამოიყენონ. როგორც Reuters წერს, პროცესს, სავარაუდოდ, რამდენიმე კვირა დასჭირდება.

თურქეთის პრეზიდენტი, რეჯეფ თაიფ ერდოღანი აცხადებდა, რომ თურქეთს არ აქვს პოზიტიური შეხედულებები ფინეთისა და შვედეთის NATO-ში გაწევრიანებასთან დაკავშირებით.

24 მაისს თურქეთმა შვედეთის NATO-ში გაწევრიანებაზე თანხმობისთვის საჭირო პირობები დაასახელა. განცხადებაში ნათქვამია, რომ NATO-ს კოლექტიური უსაფრთხოების პრინციპის თანახმად, "თურქეთი ელოდება კონკრეტულ გარანტიებს შვედეთისგან, რომელიც მხარს უჭერს ტერორისტულ ორგანიზაციებს".

თურქეთი ითხოვს "ტერორიზმის დაფინანსების წყაროს" აღმოფხვას და აცხადებს, რომ შვედეთის მთავრობა $367 მილიონით დაეხმარა PKK-სა და PYD-ს, რომლებიც საფრთხეს უქმნიან თურქეთის უსაფრთხოებას.

ამავე თემაზე: