უკრაინის გენერალური პროკურატურის ინფორმაციით, რუსეთის შეჭრის შემდეგ უკრაინაში 243 ბავშვი დაიღუპა, 446 კი დაშავდა. უწყების ცნობით, ამ დრომდე არსებული მონაცემებით, საომარ მოქმედებებს ყველაზე მეტი ბავშვი დონეცკსა და კიევის რაიონში ემსხვერპლა.

პროკურატურაში განმარტავენ, რომ ეს ცნობები არ არის სრული, რადგან ვერ ხერხდება დაბომბვის ადგილების შემოწმება აქტიური საომარი მოქმედებების ზონებში და დროებით ოკუპირებულ ტერიტორიებზე. მათივე თქმით, ყველაზე მეტი ბავშვი დაშავდა დონეცკის ოლქში — 153, კიევის ოლქში — 116.

26 მაისს ოკუპანტებმა ისევ დაბომბეს ხარკოვი, რასაც 8 მოქალაქის სიცოცხლე ემსხვერპლა. მათ შორისაა, 5 თვის ბავშვი.

პროკურატურის ცნობით, დაბომბვების შედეგად დაზიანებულია 1 937 სასწავლო დაწესებულება, ხოლო 181 მათგანი მთლიანად განადგურებულია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში