ამერიკის შეერთებული შტატების პრეზიდენტის, ჯო ბაიდენის განცხადებით, ქვეყანა უკრაინას თანამედროვე სარაკეტო სისტემებითა და საბრძოლო მასალებით მოამარაგებს.

New York Times-ის მიერ გამოქვეყნებულ ოპ-ედში ბაიდენი ამბობს, რომ შეერთებული შტატების მიზანი არის დემოკრატიული, დამოუკიდებელი, სუვერენული და აყვავებული უკრაინის დანახვა, რომელსაც აქვს საშუალება შეაჩეროს და თავი დაიცვას შემდგომი აგრესიისგან.

"ჩვენ NATO-სა და რუსეთს შორის ომს არ ვეძიებთ. რამდენადაც არ ვეთანხმები მისტერ პუტინს და მისი ქმედებები აღშფოთებას იწვევს, შეერთებული შტატები არ შეეცდება მოსკოვში მის გადაყენებას. მანამ სანამ შეერთებული შტატები ან ჩვენი მოკავშირეები არ იქნებიან თავდასხმის ობიექტები, ჩვენ პირდაპირ არ ჩავერთვებით ამ კონფლიქტში", — წერს ბაიდენი.

"ღვთის გულისთვის, ეს კაცი ვერ დარჩება ხელისუფლებაში", — განაცხადა აშშ-ის პრეზიდენტმა, ჯო ბაიდენმა 26 მარტს რუსეთის პრეზიდენტზე, ვლადიმერ პუტინზე ვარშავაში სიტყვით გამოსვლისას.

ამას გამოეხმაურა კრემლის პრესსპიკერი, დმიტრი პესკოვი, რომელმაც განაცხადა, რომ პუტინი რუსი ხალხის მიერ არის არჩეული და მისი ძალაუფლებაში ყოფნა ბაიდენის გადასაწყვეტი არ არის.

მოგვიანებით თეთრმა სახლმა უარყო, რომ ბაიდენი განცხადებაში რეჟიმის ცვლილებას გულისხმობდა.

28 მარტს ბაიდენმა თქვა, რომ მისი განცხადება ვარშავაში, რომ რუსეთის პრეზიდენტი ვლადიმერ პუტინი უნდა გადაეყენებინათ ხელისუფლებიდან, ასახავდა მის მორალურ აღშფოთებას და არა ადმინისტრაციის პოლიტიკის ცვლილებას.