"უკრაინას გმირები ცოცხალი სჭირდება", — ასე ეხმაურება უკრაინის პრეზიდენტი, ვოლოდიმირ ზელენსკი აზოვსტალიდან მარიუპოლის მცველების გაყვანას. დღეს გენერალურმა შტაბმა 264 სამხედროს გაყვანა დაადასტურა და აღნიშნა, რომ მათი უკრაინის კონტროლირებად ტერიტორიაზე დაბრუნება ტყვეების გაცვლით მოხდება.

როგორც უკრაინული მედია, უკრაინსკა პრავდა წერს, ზელენსკი 274 სამხედროს გაყვანაზე საუბრობს და ამბობს, რომ 53 მძიმედ დაჭრილი ნოვოაზოვსკის სამედიცინო დაწესებულებაში გადაიყვანეს, ხოლო 221 ოლენევკაში. უკრაინული მხარის ცნობით, გრძელდება დარჩენილი სამხედროების გადარჩენის ღონისძიებები.

"რთული დღე იყო, თუმცა ეს დღე, როგორც სხვები, ჩვენი ქვეყნისა და ხალხის დაცვისკენ არის მიმართული. უკრაინული სამხედროების წყალობით — შეიარაღებული ძალების, დაზვერვის, ასევე, მოლაპარაკების გუნდის, წითელი ჯვრის საერთაშორისო კომიტეტისა და გაეროს დახმარებით, ჩვენი ბიჭები გადარჩებიან.

მინდა ხაზი გავუსვა, რომ უკრაინას უკრაინელი გმირები ცოცხალი სჭირდება. ეს არის ჩვენი პრინციპი. ვფიქრობ, ყველა ადეკვატური ადამიანი გაიგებს ამ სიტყვებს", — განაცხადა მან.

დღეს აზოვის ბატალიონის მეთაურმა, დენის პროკოპენკომ განაცხადა, რომ უმაღლესი სამხედრო სარდლობის მიერ დამტკიცებულ გადაწყვეტილებას ასრულებდნენ და ხალხის მხარდაჭერის იმედი ჰქონდათ. მას დეტალებზე არ უსაუბრია, თუმცა მოგვიანებით Reuters-მა დაწერა, რომ მათი ინფორმაციით, აზოვსტალი რამდენიმე ათეულმა ავტობუსმა დატოვა, სადაც, სავარაუდოდ, სამხედროები იმყოფებოდნენ.

16 მაისს რუსეთის თავდაცვის სამინისტრომ განაცხადა, რომ აზოვსტალის ქარხნიდან დაჭრილი უკრაინელი ჯარისკაცების ევაკუაციაზე შეთანხმდნენ. უკრაინულ მხარეს ამასთან დაკავშირებით კომენტარი არ გაუკეთებია.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში