საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის განცხადებით, რუსეთის წინააღმდეგ სანქციების მე-6 პაკეტზე შეთანხმებისთვის ჯერ ისევ არ მიუღწევიათ. მის კომენტარს Reuters ავრცელებს.

"სამწუხაროდ, დღეს შეთანხმების მიღწევა ვერ მოხერხდა", — განაცხადა მან.

რუსეთის წინააღმდეგ სანქციების ახალ პაკეტზე, სადაც, შესაძლოა ემბარგოს საკითხიც შევიდეს, ევროკავშირში უთანხმოებაა. 11 მაისს Financial Times წერდა, რომ ევროკავშირი რუსეთის წინააღმდეგ სანქციების მე-6 პაკეტში ცვლილებების შეტანას გეგმავდა. კერძოდ, ბრიუსელი აპირებდა შეეჩერებინა წინადადება, რომლის თანახმადაც, ევროკავშირის გადაზიდვის ინდუსტრიას რუსული ნედლი ნავთობის გადატანა აეკრძალებოდა.

6 მაისს ევროკომისიის პრეზიდენტმა, ურსულა ფონ დერ ლაიენმა სანქციების მეექვსე პაკეტი წარადგინა. მისი თქმით, სანქცირებულთა სიაში იქნებიან ის სამხედრო ოფიცრები, რომლებმაც ბუჩაში ომის დანაშაულები ჩაიდინეს. ამასთან, ლაიენმა აღნიშნა, რომ აპირებენ რუსული ნავთობის იმპორტის ეტაპობრივად გაუქმებას, რათა ზეწოლა რუსეთზე გაიზარდოს.