დიდი შვიდეულის ქვეყნებმა შეხვედრის დასრულების შემდეგ საერთო განცხადება გამოაქვეყნეს, სადაც უკრაინის მიმართ სოლიდარობა კიდევ ერთხელ გამოხატეს და რუსეთის სამხედრო აგრესია დაგმეს.

მათი თქმით, არასდროს აღიარებენ საზღვრებს, რომლის შეცვლაც რუსეთმა სამხედრო აგრესიით სცადა. დიდი შვიდეულის ქვეყნები რუსეთს კვლავ მოუწოდებენ, რომ ცეცხლი შეწყვიტონ და საკუთარი ჯარები ქვეყნიდან დაუყოვნებლივ გაიყვანონ.

"მოვუწოდებთ რუსეთს დაუყოვნებლივ შეასრულოს საერთაშორისო სამართლის 2022 წლის 16 მარტის სავალდებულო ბრძანება, დაემორჩილო გაეროს გენერალური ასამბლეის შესაბამის რეზოლუციებსა და შეაჩეროს სამხედრო აგრესია. შეწყვიტოს ცეცხლი და უპირობოდ გაიყვანოს თავისი ჯარები უკრაინის იმ ტერიტორიიდან, რომელიც საერთაშორისოდ აღიარებულ საზღვებშია.

[...] ჩვენ არასდროს ვაღიარებთ საზღვებს, რომლის შეცვლაც რუსეთმა სამხედრო აგრესიით სცადა. განვაგრძობთ ჩართულობას უკრაინის, მათ შორის, ყირიმისა და ყველა სხვა სახელმწიფოს სუვერენიტეტისა და ტერიტორიული მთლიანობის მხარდასაჭერად. ვგმობთ ქიმიური, ბიოლოგიური ან ბირთვული იარაღის გამოყენების უპასუხისმგებლო მუქარას", — აცხადებენ G7-ის ქვეყნები.

განცხადებაში, ასევე, ნათქვამია, რომ ბოლო უნდა მოეღოს ტრაგიკულ ტანჯვასა და სიცოცხლის დაკარგვას, რასაც რუსეთი ისევ აგრძელებს. აღნიშნულია, რომ რუსეთმა დაარღვია გაეროს წესდება და შეარყია მისი ფუნდამენტური პრინციპები, ასევე, ევროპული უსაფრთხოების არქტიტექტურა.

დიდი შვიდეულის ქვეყნებმა მხარდაჭერა გამოხატეს უკრაინაში რუსეთის ომისა და კაცობრიობის წინაშე ჩადენილი დანაშაულების გამოძიების მიმართ. მათ, ასევე, აღნიშნეს, სხვადასხვა ქვეყნის როლი უკრაინიდან ლტოლვილების მიღების საკითხში და ამ კუთხით, განსაკუთრებით ხაზი გაუსვეს მოლდოვას მხარდაჭერას.

განცხადებაში საუბარია რუსეთის ენერგორესურსებზე დამოკიდებულების შემცირების მნიშვნელობაზე. ნათქვამია, რომ მთელ ძალისხმევას მოახმარენ, რათა რუსეთის ენერგორესურსებზე მოთხოვნა რაც შეიძლება სწრაფად შემცირდეს.

გარდა ამისა, G7 ქვეყნები რუსეთსა და ბელარუსში მოსახლეობის მიმართ არსებულ რეპრესიებს ეხმაურებიან და გმობენ მედიის, სამოქალაქო საზოგადოებისა და ოპოზიციის მიმართ დამოკიდებულება, მედიის ცენზურას და დამოუკიდებელ მედიაზე წვდომის შეფერხების სხვა მეთოდებს.

"დიდი შვიდეული რუსეთთან ან რუს ხალხთან ომში არ არის. რუსეთის უკრაინაზე თავდასხმის გადაწყვეტილება იმ ლიდერებმა მიიღეს, რომლებიც დემოკრატიულ პასუხისმგებლობებს უარყოფენ. მხარს ვუჭერთ მათ, ვინც რეპრესიების მსხვერპლი გახდა. ვადასტურებთ რუსებისა და ბელარუსების უფლებას, მოიძიონ, მიიღონ და გაავრცელონ ფაქტებზე დაფუძნებული ინფორმაცია თავისუფალი, პლურალისტური და დამოუკიდებელი მედიისგან", — ნათქვამია განცხადებაში.